SPAK ka marrë zyrtarisht të pandehur ish-anëtarin e Komisionit të Prokurimit Publik, Kreshnik Tërnova, në hetimin për tenderat e Spitalit Dibër.
Tërnova akuzohet për favorizim në gara dhe ankande publike, si dhe për deklarime të rreme përpara oficerit të Byrosë Kombëtare të Hetimit.
Çështja po hetohet nga prokurori Elvin Gogaj, nën dyshimin se ish-anëtari i KPP-së ka favorizuar kompaninë Euromed në procedura prokurimi.
Euromed zotërohet nga biznesmeni Engjëll Hoxha, i cili ka 90% të aksioneve, ndërsa pjesa tjetër mbahet nga Hervin Fora.
Kompania rezulton si një nga përfitueset e mëdha të tenderëve të barnave në spitalet e vendit.
SPAK dyshon se përfitimet e saj janë ndikuar nga proceset në Komisionin e Prokurimit Publik dhe nga njohjet e Hoxhës me Tërnovën.
Sipas të dhënave të hetimit, Tërnova ka mohuar në SPAK njohjen me biznesmenin Engjëll Hoxha.
Por ky pretendim dyshohet se është rrëzuar nga tabulatet telefonike, të cilat sipas hetuesve tregojnë kontakte mes tyre.
Në hetim pritet të përfshihen edhe veprimet e tre anëtarëve të tjerë të KPP-së, që kanë firmosur vendimin për shpalljen fituese të kompanisë së Hoxhës.
Bëhet fjalë për një procedurë prokurimi të vitit 2025, ku kompania ishte skualifikuar më parë, por më pas u shpall fituese pas vendimmarrjes në KPP.
Hetimi lidhet edhe me dëshminë e Gerond Meçes në SPAK, pas ngjarjes së pengmarrjes, ku ai ka deklaruar se grupi i pengmarrësve kishte akses të drejtpërdrejtë në veprimtarinë e regjistrit të ankesave në KPP.
Pas kësaj dëshmie, SPAK po verifikon edhe rolin e Kreshnik Tërnovës në këtë proces.
Dyshimet e hetuesve janë se Tërnova mund të ketë qenë njeriu i dyshes Agasi-Beqiri në Komisionin e Prokurimit Publik. Hetimi pritet të sqarojë nëse vendimmarrja në KPP është përdorur për të favorizuar kompani të caktuara në tenderët e barnave dhe pajisjeve mjekësore.
