Një nga grupet e mashtrimit on-line, përmes rrjetit të Call-Centërave në Tiranë, nuk ka mundur të lirohet nga burgu në Gjykatën e Apelit të kryeqytetit, edhe pse ata përdorën si “truke” para gjykatës nevojën për tu kujdesur ndaj fëmijëve të mitur, grave shtatzëna e deri tek operacionet kirurgjikale.
Megjithëse shumica e tyre duke filluar nga Ledio Toçi, Xhoel Mekolli, e të tjerë, kanë pretenduar në gjykatë se janë familjarë të rregullt, kanë fëmijë dhe gra shtatzëna për tu kujdesur, sërish nuk e kanë bindur gjyqtaren e Apelit, Valdete Hoxha, ti zbusë masën e sigurisë nga “Arrest në burg” në një masë më të butë izolimi.
Toçi, ka kërkuar zbutjen e masës së sigurisë pasi duhet të ushtronte detyrën e babait për përkujdesjen e një fëmije 2 vjeç. Ndërsa në të njëjtën linjë me të ishte dhe Xhoel Mekolli, i cili ka pretenduar se bashkëjetuesja e tij, A. Bishami, është shtatzënë dhe duhet të kujdeset për të, pasi ka rrezik.
Plus Mekolli, shtoi në gjykatë se vijimi i qëndrimit në burg i tij, rrezikon marrjen e infeksioneve, pasi i është nënshtruar një operacioni kirurgjikal, konkretisht për “Sinus pilonidal recidiv”.
Tashmë Gjykata e Apelit Tiranë, ka zbardhur vendimin e plotë, duke i cilësuar, Eduart Dalla, Mateo Hoxha, Tedi Agastra, Ledio Toçi, Xhoel Mekollin, Aida Voklin, Ledjon Cenaj dhe persona të tjerë në kërkim, si individë që kanë bashkëpunuar mes njëri-tjetrin, duke mashtruar qindra qytetarë të huaj e për pasojë kanë sjellë dëme të mëdha ekonomike.
Në vendimin e zbardhur Gjykata e Apelit, vlerëson ekzistencën e këtij rrjeti “Call-Center-ash” që vepronin në Shqipëri, të organizuar nëpërmjet kompanive të marketingut online, ku disa persona dyshohet se siguronin infrastrukturën teknike, disa administronin kompanitë dhe ambientet, ndërsa persona të tjerë dyshohet se përfitonin dhe transferonin fondet e ardhura nga mashtrimi i shtetasve të huaj.
Sipas vendimit të gjykatës, Eduard Dalla, dyshohet si person që siguronte dhe menaxhonte infrastrukturën teknike të internetit dhe lidhjeveVOIP për call center-at.
Dyshimi ndaj tij lidhet me faktin se numri i tij i telefonit rezultonte i përdorur në kontrata interneti të lidhura me IP-të e identifikuara nga autoritetet austriake.
Gjithashtu, nga përgjimet dhe verifikimet rezulton se ai komunikonte me kompani interneti për instalime në adresa të ndryshme dhe dyshohet se shërbente si ndërmjetës për sigurimin dhe shpërndarjen e internetit në ambientet ku zhvillohej aktiviteti i Call-Center-ave.
Mateo Hoxha dhe Tedi Agastra, dyshohen si persona me rol qendror në skemën financiare të mashtrimit.
Sipas të dhënave të autoriteteve austriake, në adresat e tyre kripto kanë kaluar shuma shumë të mëdha parash që lidhen me investimet e kryera nga viktimat.
Konkretisht, Mateo Hoxha dyshohet të ketë përfituar mbi 3.2 milion USD, ndërsa Tedi Agastra mbi 4.8 milion USD. Prokuroria dyshon se ata janë përfituesit fundorë të kriptovalutave të lidhura me aktivitetin mashtrues.
Gjithashtu, Ledio Toçi, dyshohet si person i lidhur drejtpërdrejt me ambientet dhe aktivitetin e Call Center- ave.
Ai rezulton të ketë qenë punësuar në kompani “Call-Center” si “Upstream Creative” dhe “Victory Communication”, ndërsa banesa ku ishte instaluar një nga lidhjet e internetit të përdorura në mashtrim rezultonte e marrë me qira prej tij dhe Aida Voklit.
Gjithashtu, një numër telefoni i referuar nga autoritetet austriake rezultonte formalisht në emër të vëllait të tij, por dyshohej se përdorej prej, Ledio Tocit.
Po ashtu dhe Xhoel Mekolli, dyshohet si person i lidhur me aktivitetin e call center-aveper shkak se IP. të e identifikuara nga autoritetet partnere rezultonin të përdorura edhe prej tij, ndërsa analizat teknike treguan numër të lartë lidhjesh me këto IP.
Mekolli, gjithashtu kishte qenë i punësuar në subjektin “Espiron Studio” dhe është konstatuar pranë ambienteve të dyshuara gjatë vëzhgimeve policore. /Syri.net, Elton Qyno
