Operacioni i koduar “End Point”, i zhvilluar nga Policia e Shtetit në bashkëpunim me Prokurorinë e Tiranës pas sinjalizimit të autoriteteve austriake për mashtrimin e qindra qytetarëve, çoi në goditjen e dy call centerave që vepronin në zonën e Liqenit të Thatë.
Në njërin prej tyre u arrestuan administratorët Marjo Kolli dhe Bjorn Kareco, emra të njohur për organet ligjzbatuese pasi rezultojnë të arrestuar edhe më 22 shtator 2023 gjatë operacionit “Momentum”. Sipas hulumtimeve të publikuar, dy të rinjtë konsiderohen si administratorë formalë, ndërsa pronari faktik i aktivitetit dyshohet të jetë biznesmeni Flladi Malaj, i njohur prej më shumë se 15 vitesh në industrinë e call centerave në Tiranë.
Lidhja mes operacionit të vitit 2023 dhe goditjes së fundit përforcohet edhe nga emri “Momentum”, i përdorur nga Policia e Shtetit për operacionin e mëparshëm, por që përkon edhe me emërtimin e grupit të kompanive të krijuara dhe kontrolluara nga Flladi Malaj.
Dokumentet e Qendrës Kombëtare të Biznesit tregojnë se Malaj ka ngritur ndër vite një rrjet kompanish me aktivitet call-center, mes tyre “Albreeze”, “ACME Studio”, “Casa Mokador”, e cila më pas u riemërua “Eden Breeze”, “Mokador by Momentum” dhe më vonë “Momentum Group”, si dhe “Info Tirana”, “Dekript Media Group” dhe “Akademia Profesionale M&G”. Shumica e këtyre subjekteve janë regjistruar në adresën e Rrugës “Prokop Mima” në Tiranë.
Sipas pretendimeve të publikuara në materialin investigativ, Flladi Malaj dhe vëllai i tij Xhulio Malaj, të përmendur si persona me lidhje familjare dhe shoqërore me figura të njohura politike e kriminale, dyshohet se kanë përdorur këto struktura call-center për të mashtruar qindra qytetarë dhe biznesmenë të vendeve të Bashkimit Europian përmes platformave Forex, BrokerZ, Globalix, Bitcoin dhe skemave të ngjashme investimi.
Mbetet për t’u parë nëse Prokuroria e Tiranës do të shkojë deri në identifikimin dhe goditjen e organizatorëve të dyshuar të aktivitetit, apo nëse, si pas operacionit “Momentum”, çështja do të kufizohet vetëm tek administratorët e arrestuar.
