Bashkimi Europian edhe pse ende nuk ka një manual të vetëm evropian për masat e karantinës, në rast të shpërthimit të një pandemie, ka marrë masa për tu përgatitur krahasuar me periudhën para gjashtë viteve. Ekspertët deri më tani kanë hedhur poshtë arsyet për panik lidhur me hantavirusin, por vdekjet e shkaktuara në anijen turistike MV Hondius po ngrenë shqetësime.
Edhe pse Qendra Evropiane për Parandalimin dhe Kontrollin e Sëmundjeve (ECDC) e ka klasifikuar rrezikun si shumë të ulët, Këshilli i Bashkimit Evropian javën e kaluar aktivizoi mekanizmin e tij të reagimit ndaj krizave në modalitetin e ndarjes së informacionit për të monitoruar në mënyrë aktive shpërthimin. Megjithatë, kjo nuk është e vetmja masë që BE-ja mund të përdorë, ajo ka më shumë mjete për tu përballur me shpërthimin në rast të një përshkallëzimi serioz.
Kur bëhet fjalë për masat e karantinës dhe parandalimit, nuk ka një protokoll të unifikuar apo një manual evropian. Një përgjigje kaq e fragmentuar mund të kishte qenë problem pas shpërthimit të fundit të hantavirusit, por deri më tani, përgjigja ndërkombëtare ndaj virusit duket se ka qenë më e koordinuar.
Sipas udhëzimeve të Organizatës Botërore të Shëndetësisë, disa vende, si Gjermania, Italia, Spanja, Mbretëria e Bashkuar dhe vende të tjera evropiane po ndjekin protokolle të ngjashme, duke përfshirë karantinë deri në gjashtë javë për kontaktet me rrezik të lartë, testime PCR, monitorim të rreptë dhe kufizime lëvizjeje.
Në disa shtete si Mbretëria e Bashkuar dhe Franca, izolimi përfshin edhe qëndrimin në spital për një pjesë të periudhës së karantinës, ndërsa vende të tjera si Gjermania, Italia dhe Spanja lejojnë izolim në shtëpi me mbikëqyrje mjekësore. Ndërsa, vende të tjera jo-evropiane, si Australia dhe Kanadaja, po zgjedhin në vend të kësaj një karantinë më të shkurtër tre-javore.
Cilat janë protokollet anti-pandemike të BE-së?
Pas pandemisë COVID-19, BE-ja hartoi protokolle për të përmirësuar shpejtësinë, koordinimin dhe reagimin ndaj kërcënimeve ndërkufitare shëndetësore, për të shmangur kaosin e shkaktuar nga rregulloret dhe raportimet e ndryshme, si dhe mosmarrëveshjet mbi miratimin dhe shpërndarjen e vaksinave në të gjithë bllokun.
Nëse në BE shfaqet një epidemi e re, dy rregullore janë tani veçanërisht të rëndësishme. E para është Rregullorja 2022/2371. Dispozita kryesore e saj kërkon që vendet të njoftojnë njëra-tjetrën sa më shpejt të jetë e mundur, brenda 24 orëve, përmes Sistemit të Paralajmërimit dhe Reagimit të Hershëm.
Gjithashtu një kërcënim konsiderohet mjaftueshëm serioz, kur është i papritur për vendin dhe shkakton shumë vdekje, përhapet shpejt ose prek disa vende dhe kur shteti nuk ka mundësi ta përballojë vetëm. Protokolli ka më shumë të bëjë me kontrollin dhe koordinimin, duke përcaktuar procedurat për miratimin e përbashkët dhe grumbullimin e vaksinave dhe ilaçeve, e cila ishte një nga çështjet më të diskutueshme gjatë pandemisë së fundit.
Rregullorja e parë mund të aktivizohet nga Komisioni Evropian bazuar në rekomandimet e ECDC-së ose Agjencisë Evropiane të Barnave, ndërsa Këshilli i Bashkimit Evropian mund të lançojë të dytën. Për më tepër, shtetet anëtare të BE-së mund të përdorin Mekanizmin Evropian të Mbrojtjes Civile, i cili përqendrohet në mbështetjen për ekipet e reagimit dhe pajisjet.
Përveç vendeve të BE-së, edhe disa shtete jo-anëtare, përfshirë Shqipërinë, Serbinë, Maqedoninë e Veriut dhe Malin e Zi janë përfshirë në Mekanizmin Evropian të Mbrojtjes Civile, i cili u aktivizua së fundmi nga Spanja në lidhje me rastet e hantavirusit.
