Firma Auto Europa, me qendër në Xhafzotaj të Durrësit, po përballet me akuza të forta nga klientë që janë mashtruar me automjete të pajisura me sisteme jo origjinale, të prezantuara si pjesë fabrike.
Një denoncim i mbërritur pranë JOQ hedh dyshime serioze mbi mënyrën sesi kompania e drejtuar nga Indrit Bardho modifikon automjetet para shitjes, duke montuar pajisje të ndryshme jashtë standardeve të prodhuesit dhe duke i reklamuar si aksesorë origjinalë të markës.
Rasti konkret lidhet me një automjet tip Volkswagen ID.6, i blerë në qershor të vitit 2023 për rreth 41 mijë euro. Sipas pretendimeve të blerësit, makina u shit si e pajisur me sistem “kamera 360 gradë” origjinal fabrike, por pas një periudhe përdorimi filluan problemet serioze teknike.
Edhe pse automjeti kishte vetëm 30 mijë kilometra dhe ndodhej ende brenda garancisë, ai shfaqi defekte të rënda në sistemin elektrik dhe në pajisjen multimediale. Verifikimet paraprake të ekspertëve ngritën dyshime se sistemi i kamerave nuk ishte montuar në fabrikë, por ishte instaluar më pas në servis, brenda ambienteve të kompanisë.
Sipas ekspertëve, ndërhyrje të tilla mund të dëmtojnë funksionimin elektronik të automjetit dhe të cenojnë sigurinë e tij në qarkullim. Pikërisht ky modifikim dyshohet të ketë shkaktuar problemet teknike që u shfaqën në mjet.
Por polemikat nuk ndalen vetëm te pajisjet. Sipas denoncimit, kompania refuzon të mbajë përgjegjësi për defektet, duke iu referuar një klauzole kontraktuale që detyron klientët të kryejnë servis vetëm pranë serviseve të saj, në të kundërt humbasin garancinë.
Megjithëse automjeti vazhdon të jetë brenda afatit 5-vjeçar të garancisë dhe limitit prej 100 mijë kilometrash, pronari i kompanisë, sipas pretendimeve të denoncuesit, nuk ka vënë në dispozicion dokumentacionin teknik që provon origjinën e sistemit të kamerave.
Ndërkohë, kompania justifikohet me faktin se operon me modele të importuara nga tregu kinez, por kjo nuk ka shuar pikëpyetjet mbi standardet e pajisjeve të montuara dhe transparencën ndaj klientëve.
