Kryeministri Edi Rama ka nisur këtë të premte turin “Për punët e Shqipërisë”. Mbledhja, e planifikuar në orën 11:00, ka bërë bashkë drejtues vendorë nga e gjithë vendi, ndërsa vetë kreu i qeverisë ka mbërritur në ambientet ku po zhvillohet aktiviteti.
Por takimi është shoqëruar me polemika, pasi kryetari demokrat i Bashkisë së Pukës, Rrok Dodaj, deklaron se nuk është lejuar të marrë pjesë. Ai ka bërë të ditur se kishte marrë një ftesë zyrtare përmes postës elektronike, por në momentin e paraqitjes nuk është lejuar të hyjë në sallë, pasi emri i tij nuk figuronte në listën e pjesëmarrësve.
Sipas Dodajt, më pas është kontaktuar nga përfaqësues të Partisë Socialiste, të cilët i kanë sqaruar se ftesa i ishte dërguar gabimisht për shkak të një keqkuptimi administrativ.
Ndërkohë, situata me ftesat duket e paqartë edhe për drejtues të tjerë vendorë të opozitës. Disa kryebashkiakë demokratë pranojnë se kanë marrë ftesë, ndërsa të tjerë thonë se nuk janë kontaktuar fare.
Kështu, Miftar Dauti dhe Albert Mëlyshi deklarojnë se nuk kanë marrë asnjë ftesë për të qenë pjesë e takimit. Nga ana tjetër, Hilë Curri konfirmon se është ftuar dhe ka qenë në dijeni të aktivitetit.
