Kryeministri Edi Rama ka komentuar rritjen e çmimeve të karburanteve në Shqipëri, duke e lidhur situatën me zhvillimet e fundit globale pas konfliktit në Iran.
Në podcastin e tij “Flasim”, ai theksoi se kriza ndërkombëtare ka ndikuar drejtpërdrejt në zinxhirin e furnizimit me naftë, duke sjellë rritje të menjëhershme të çmimeve në treg.
Megjithatë, Rama nuk dha një shpjegim të qartë se pse çmimet e naftës në Shqipëri u rritën vetëm dy ditë pas nisjes së konfliktit, kur ende nuk kishte asnjë anije me naftë të zhdoganuar me çmim të rritur ndërkombëtar.
Menjëherë pas paralajmërimit të tij, çmimi i karburantit u rrit me 20 lekë për litër, gjë që ka ngritur dyshime për abuzim dhe mungesë transparence.
Ai tha se, “në të njëjtën kohë është marrë edhe një vendim tjetër për të ndërhyrë me një masë të përkohshme, gjë që po e bëjnë edhe vende tjera në akcizën e naftës, duke i bërë asaj një ulje me rreth 20 %, në mënyrë që të lehtësohet, si të thuash, disi barra mbi përdoruesit e automjeteve.
Por ndërkohë, dua ta them shumë, shumë qartë, që në fund të ditës, ajo që ne na intereson e para është që të mbrojmë pensionistët, që do të thotë se në këtë rast, niveli i rritur i përfitimit që do të vijë në arkën e shtetit nga rritja e çmimit, cilidoqoftë ai, pas uljes që iu bë akcizës, do të shkojë vetëm për të mbrojtur pensionistët, vetëm për të mbështetur pensionistët”.
