Një parakalim i rrezikshëm dyshohet se është bërë shkak i një aksidenti të rëndë rrugor që la dy viktima dhe tetë të plagosur në Caravaggio, në Itali, ku u përfshinë katër automjete.
Ngjarja ndodhi rreth orës 12:30 të së dielës, më 15 mars, në rrugën provinciale 185 “Rivoltana”, në segmentin që të çon drejt Mozzanica, pranë një restoranti të zonës.
Sipas rindërtimit paraprak të hetuesve, aksidenti dyshohet të jetë shkaktuar nga një makinë tip Mercedes C180. Në timon ishte një 29-vjeçare me origjinë shqiptare, residente në Calvenzano.
Gruaja dyshohet se tentoi të parakalonte një Volkswagen Sharan ku udhëtonte një familje me pesë persona nga Madignano, në provincën e Crema.
“Dëshironte të më parakalonte, por më pas kuptoi se nuk kishte hapësirë dhe u përpoq të kthehej në korsinë e saj duke më goditur anash, gjë që më bëri të humbas kontrollin”, rrëfeu drejtuesi 48-vjeçar.
Makina e tij doli fillimisht nga rruga, mori baltë në rrota dhe më pas u rikthye në asfalt duke u rrotulluar, derisa përfundoi duke u përplasur me një Jeep që drejtohej nga një 74-vjeçar nga Fontanella.
Pas përplasjes së parë, edhe Mercedes-i humbi kontrollin dhe përfundoi në korsinë e kundërt. Në atë moment nga drejtimi i kundërt po vinte një Citroen C5 me një familje prej pesë personash nga Cernusco sul Naviglio.
Në makinë ndodheshin një 38-vjeçar në timon, bashkëshortja e tij 35-vjeçare, dy vajzat e tyre 5 dhe 6 vjeç, si dhe vjehrra 73-vjeçare. Në automjet ishte edhe qeni i familjes, një Golden Retriever.
Mediat italiane shkruajnë se përplasja mes dy makinave ishte frontale dhe shumë e fortë. Mercedes-i u shkatërrua në pjesën e përparme dhe u rrotullua disa herë, ndërsa Citroen-i doli nga rruga dhe përfundoi në një kanal.
38-vjeçari Fabio Saladdino dhe vjehrra e tij 73-vjeçare Adele Villa u plagosën rëndë dhe, pavarësisht përpjekjeve të shpëtimtarëve, humbën jetën pak më vonë.
Për të nxjerrë viktimat nga makina, zjarrfikësit u detyruan të presin karrocerinë e automjetit. Dy vajzat e vogla shpëtuan pa lëndime të rënda dhe u dërguan përkohësisht në restorantin pranë vendit të aksidentit për t’i larguar nga skena e tragjedisë. Nëna e tyre, Silvia Goretti, u transportua me helikopter në gjendje jo kritike në spitalin Papa Giovanni XXIII Hospital në Bergamo.
Edhe 29-vjeçarja shqiptare u dërgua me helikopter në spitalin civil të Brescia me plagë kryesisht në këmbë.
Sipas avokates së saj, Carlotta Filippi, klientja po kthehej drejt shtëpisë së saj në Calvenzano dhe një makinë tjetër mund të ketë qenë shkaku i situatës që çoi në përplasjen fatale.
Ndërkohë, momenti i aksidentit dyshohet se është filmuar nga kamerat e sigurisë së restorantit pranë vendit të ngjarjes. Pamjet janë sekuestruar nga policia për hetime të mëtejshme.
