Pas kërcënimeve të publikuara nga grupi i hakerave iranianë Homeland Justice të cilët kanë sulmuar postën elektronike të Parlament, eksperti i sigurisë kibernetike Tomi Kallanxhi ka ngritur shqetësimin për sigurinë digjitale të institucioneve shqiptare.
“Me sa u kuptua nga screenshot-et që u publikuan, ata kanë hyrë në të gjithë serverin e email-eve, që do të thotë se mund të kenë akses në email-et e rreth 140 deputetëve,” u shpreh Kallanxhi.
Eksperti paralajmëroi se nëse hakerat kanë akses në email-et e deputetëve, ata mund të lexojnë komunikimet, por edhe të dërgojnë mesazhe në emër të tyre pa u vënë re.
“Nëse dikush ka akses në email-in tënd, mund të komunikojë me personat me të cilët ke folur më parë dhe ti mund të mos e kuptosh kurrë, sepse këto mesazhe mund të fshihen edhe nga sent emails,” tha ai.
Kallanxhi theksoi se infrastruktura digjitale e institucioneve në Shqipëri është e fragmentuar, pasi çdo institucion menaxhon serverat e vet, gjë që sipas tij e dobëson sigurinë. Ai sugjeroi që të dhënat dhe sistemet digjitale të institucioneve shtetërore të centralizohen në një qendër të madhe të dhënash dhe të monitorohen nga një ekip i specializuar ekspertësh.
“Çdo institucion ka IT-të e vetë, ka serverat e vetë që duhet të menaxhojë secili IT. Edhe kjo gjë e dobëson infrastrukturën digjitale, sepse kjo gjë e bën që secili të ruajë baçen e vetë. Në qoftë se këto serverat dhe infrastrukturat digjitale duhet të ishin në një vend, në një data center të madh që të monitoroheshe nga një grup ekspertësh edhe më të rëndësishëm, sesa një IT i një institucioni, që patjetër nuk i lë asnjë lloj përgjegjësie, sepse ai bën shumë gjëra dhe duhet të bëjë edhe menaxhimin e serverave të menaxhojë securitin e tjerë me radhë dhe me sa di janë shumë pak veta staf që merren me këtë gjë. Në qoftë se shteti shqiptar këtë gjë do ta kishe në një data center dhe të menaxhonin këto data center-at me Emailin do ta kishte edhe më kollaj”, tha ai.
Ndërkohë, grupi i hakerave ka paralajmëruar se mund të publikojë komunikime dhe materiale që pretendohet se lidhen me afera apo komunikime të brendshme të politikanëve shqiptarë.
“Nuk e besoj që deputetët i kanë përdorur edhe për gjëra të tjera. Uroj mos jenë përdorur dhe për gjëra të tjera, sepse kjo gjë mund t’i cenojë edhe privatësinë e tyre për të ndjekur në një farë mënyre se çfarë kanë bërë, ku janë regjistruar, çfarë imeilesh kanë marrë, me kë kanë folur e tjerë me radhë. Kështu që patjetër që kjo gjë është e rëndë. dhe kur ndodh për të dytën herë në të njëjtin institucion. Po është edhe më serioze çështja”.
Eksperti theksoi se për qytetarët e zakonshëm rreziku është më i ulët, pasi shumica përdorin platforma të mëdha si email-et e ofruara nga kompani ndërkombëtare, të cilat kanë sisteme më të avancuara sigurie.
