Inflacioni i matur sipas metodologjisë së Eurostat ka shënuar një rritje prej 2,3% në muajin janar 2026, duke konfirmuar një nisje të qëndrueshme të vitit sa i përket dinamikës së çmimeve në Shqipëri. Të dhënat zyrtare të publikuara nga INSTAT në raportin “Indeksi i Harmonizuar i Çmimeve të Konsumit – Janar 2026” tregojnë se inflacioni vjetor, sipas IHÇK, mbetet mbi mesataren e Bashkimit Europian, e cila për të njëjtin muaj rezulton 2,0%.
Sipas raportit, rritja më e madhe vjetore e çmimeve është regjistruar në grupin “Argëtim, sport dhe kulturë” me 9,8%, duke qenë kontributori kryesor në inflacionin total. Pas tij renditen “Kujdesi personal, mbrojtja sociale dhe mallra e shërbime të ndryshme” me 3,7%, “Pije alkoolike dhe duhan” si dhe “Sigurime dhe shërbime financiare” me 3,1% secili. Grupi me peshën më të madhe në shportë, “Ushqime dhe pije joalkoolike”, ka shënuar një rritje vjetore prej 2,3%, duke dhënë edhe ndikimin më të madh në rezultatin total të inflacionit.
Nga ana tjetër, grupi “Transporti” ka regjistruar një ulje vjetore prej 0,7%, duke zbutur presionin inflacionist në muajin e parë të vitit . Edhe grupet e energjisë dhe shërbimeve bazë (“Qira, ujë, energji elektrike, gaz dhe karburante të tjera”) kanë pasur një rritje të moderuar prej 0,7% në terma vjetorë.
Në planin mujor, krahasuar me dhjetorin 2025, çmimet e konsumit janë rritur me 0,6%. Rritja mujore është nxitur kryesisht nga shtrenjtimi i “Sigurimeve dhe shërbimeve financiare” me 2,8%, “Argëtim, sport dhe kulturë” me 1,6% dhe “Ushqime dhe pije joalkoolike” me 1,3% . Në të kundërt, janë ulur çmimet e grupit të energjisë (-0,7%), veshjeve dhe këpucëve (-0,4%) si dhe restoranteve e shërbimeve të akomodimit (-0,2%).
IHÇK, ndryshe nga Indeksi i Çmimeve të Konsumit (IÇK), përfshin të gjitha shpenzimet e kryera brenda territorit të Shqipërisë, përfshirë edhe ato të turistëve, dhe përdoret për krahasime ndërkombëtare në kuadër të Bashkimit Europian. Ai hartohet sipas rregulloreve të Eurostat dhe ka si vit bazë 2025=100.
Metodologjikisht, duke filluar nga shkurti 2026, indeksi do të përllogaritet sipas klasifikimit të ri ECOICOP 2018, në përputhje me Rregulloren (BE) 2024/3159, çka synon harmonizim të plotë me praktikat statistikore europiane.
Në tërësi, inflacioni prej 2,3% në janar sinjalizon një nivel relativisht të kontrolluar të çmimeve në fillim të vitit 2026, por me presione të dukshme nga segmentet e shërbimeve dhe argëtimit, ndërsa energjia dhe transporti kanë luajtur rol stabilizues. Dinamika e muajve në vijim do të jetë vendimtare për të parë nëse ky trend do të konsolidohet pranë objektivit të stabilitetit të çmimeve në rajon. /ekofin.al
