Katër persona janë dënuar me burgim të përjetshëm për vrasjen e një shtetasi shqiptar në Australi, ngjarje e ndodhur më tetor 2018 në periferinë veriore të Adelaide.
Sipas mediave australiane, Benjamin John Mitchell (39 vjeç), Alfred Claude Rigney (52 vjeç), Matt Bernard Tenhoopen (30 vjeç) dhe Aaron Donald Carver (42 vjeç) u shpallën fajtorë për herë të dytë për vrasjen e shqiptar-it Urim Gjabri, pas një rigjykimi të zhvilluar vitin e kaluar.
Dënimet e tyre fillestare për vrasje, të dhëna në vitin 2020, ishin rrëzuar nga High Court of Australia në apel, ç’ka çoi përsëritjen e procesit gjyqësor. Megjithatë, pas rigjykimit, ata u shpallën sërish fajtorë dhe u dënuan me burgim të përjetshëm.
Detajet e krimit
Ngjarja ndodhi në zonën Para Vista, në periferinë veriore të Adelaide, ku viktima u sulmua brutalisht gjatë një grabitjeje të lidhur me kanabisin që ai kultivonte në banesë.
Gjatë shpalljes së vendimit në Supreme Court of South Australia, gjyqtarja Julie McIntyre deklaroi se, ndonëse viktima ishte e përfshirë në aktivitete të paligjshme, “ai nuk e meritonte të vdiste”.
Sipas gjykatës, sulmi ishte rezultat i “lakmisë dhe dëshirës për të vjedhur kanabisin”, ndërsa viktima u përshkrua si një person i paarmatosur, që përbënte pak ose aspak kërcënim për grupin.
Gjyqtarja theksoi se shqiptari kishte pësuar të paktën një goditje të rëndë në kokë me një armë, që i kishte copëtuar kafkën, dhe më pas ishte lënë i plagosur rëndë, pa mundësi për të kërkuar ndihmë, pasi autorët i kishin marrë telefonin dhe automjetin.
Pasojat
Viktima, baba i tre fëmijëve, ishte zhvendosur në Australi për të punuar dhe për të siguruar të ardhura për familjen e tij, e cila jeton në Shqipëri. Sipas gjykatës, vdekja e tij ka pasur pasoja të rënda emocionale dhe financiare për bashkëshorten dhe fëmijët.
Gjykata vendosi që periudha minimale pa të drejtë lirimi me kusht për secilin prej të dënuarve të mbetet 20 vjet, ashtu si në vendimin fillestar.
Aktualisht, të katër të dënuarit kanë paraqitur sërish apel ndaj vendimit të fundit për fajësi. Çështja është shqyrtuar nga Gjykata e Apelit dhe pritet vendimi përfundimtar në një datë të mëvonshme.
