Detaje të reja kanë dalë nga ngjarja tragjike e ndodhur ditën e djeshme në zonën e Paskuqanit, ku një punëtor ndërtimi ka humbur jetën gjatë kryerjes së detyrës në një objekt në ndërtim.
Rrethanat e aksidentit mbeten ende nën hetim, ndërsa dyshohet se viktima ka rënë nga një lartësi e konsiderueshme.
Viktima është Halil Picari, 65 vjeç, i cili ishte i punësuar si ndihmës elektricist.
Ai dyshohet se ka rënë nga kati i tetë i pallatit dhe ka ndërruar jetë menjëherë për shkak të dëmtimeve të rënda të marra.
Ngjarja u tentua të mbahej e fshehtë, por pas publikimit të lajmit nga VoxNews erdhi edhe reagimi i menjëhershëm i policisë ku lajmëronte se kishte arrestuar administratorin e firmës policia duke lajmëruar se ka arrestuar administratorin e kompanisë ndërtuese “Al Great” sh.p.k., shtetasin Avni Mekshi, 61 vjeç, të cilin policia e akuzon për shkelje të rregullave të sigurisë dhe mbrojtjes në punë.
VoxNews ka mësuar se policia po heton mungesën e masave të nevojshme të sigurisë në kantier, çka mund të ketë ndikuar drejtpërdrejt në aksidentin fatal.
Nuk dihet nëse objekti ishte i pajisur me skela, rrjeta mbrojtëse dhe mjete sigurie personale për punëtorët.
Por ajo që fsheh policia eshtë kompania ndërtuese përse nuk ka marrë asnjë masë ndaj saj ku përgjegjësia sipas legjislacionit shqiptar është e përbashkët.
Le të citojmë: Nenin 289 “Shkelja e rregullave të mbrojtjes në punë, kur ka sjellë si pasojë vdekjen, dënohet me burgim.” dhe nenin 281 “Shkaktimi i vdekjes së një personi nga pakujdesia dënohet me burgim.”
Këto nene përdoren nga Prokuroria për ndjekje penale të: administratorit të nënkontraktorit, drejtuesit teknik dhe ndërtuesit.
Policia për të fshehur ndërtuesin e ka pasur me të lehtë të arrestojë vetë administratorin e firmës nën/kontraktore.
Ndërkohë, familjarët e 65-vjeçarit kërkojnë zbardhje të plotë të ngjarjes, duke shprehur shqetësim për deklarata të ndryshme dhe kontradiktore nga persona të pranishëm në kantier në momentin e aksidentit.
“Duam të dimë saktësisht se ku po punonte. Ka versione të ndryshme, disa thonë se ka rrëshqitur në shkallë, të tjerë se ka rënë nga skela. Kërkojmë që e vërteta të dalë në dritë”, janë shprehur familjarë të viktimës.
Kujtojmë se kjo ngjarje rikthen në vëmendje problematikën e sigurisë në kantieret e ndërtimit.
Kantieret e ndërtimit po kthehen ne “vatra vdekjesh” të cilat janë një shqetësim serioz edhe gjatë vitit 2025, veçanërisht në zonën e Tiranës, ku intensiteti i ndërtimeve shpesh shoqërohet me neglizhencë të standardeve bazë të mbrojtjes së jetës së punëtorëve.
Hetimet pritet të përcaktojnë përgjegjësitë ligjore dhe nëse ndaj kompanisë ndërtuese do të merren masa të tjera penale apo administrative./VoxNews
