Një banor i Kuçovës, Arben Polisi, prej tre vitesh kërkon zgjidhje për një zhurmë të padurueshme që vjen nga një biznes për prerjen e gurit dhe mermerit, vetëm 30 metra larg shtëpisë së tij.
Prej kohësh, Arbeni ka dërguar video, ankesa dhe denoncime në të gjitha institucionet, por asgjë nuk ka ndryshuar.
“I jam drejtuar Fiks Fare sepse nuk po gjej dot zgjidhje. Zhurmat dhe pluhuri janë bërë të pa përballueshme. Bashkia më tha se s’ka aparat për matjen e zhurmës, dhe më pas më solli një raport ‘vetëmonitorimi’, ku thuhej se gjithçka është brenda normave. Por këtu nuk rrihet!”, – tregon qytetari.
Sipas tij, bashkia është mjaftuar vetëm me raportin që ka sjellë vetë biznesi, pa kërkuar ndihmën e Institutit të Shëndetit Publik (ISHP) për matjen e realë të nivelit të zhurmës.
Madje, në një dokument të konsultimit me publikun, firmat e hedhura janë të disa qytetarëve që, sipas Arbenit, as nuk jetojnë në këtë lagje.
Në Agjencinë Rajonale të Mjedisit në Berat, drejtuesit pohojnë se nuk janë njoftuar asnjëherë nga Inspektorati i Mbrojtjes së Territorit (IMT) i Bashkisë Kuçovë. Ata sqarojnë se kompetencat për matjen e zhurmave i ka tashmë bashkia, në bashkëpunim me ISHP-në.
“Nuk është detyra jonë, sepse me ndryshimet e ligjit, këtë detyrë e ka bashkia. Ne nuk kemi marrë asnjë njoftim dhe nuk dimë nëse subjekti ka leje apo jo. Sipas ligjit, nëse IMT konstaton shkelje, duhet të njoftojë menjëherë AKM-në, por një raport i tillë nuk ekziston”, deklaron drejtori i ARM Berat Dritan Metaj.
Në anën tjetër, nënkryetari i Bashkisë Kuçovë Sybi Shehu pranon se bashkia nuk ka bërë matje, por është mbështetur tek raporti i vetë biznesit:
“Ne kemi ndjekur procedurën që na lejon ligji. Biznesi ka bërë vetëmonitorim dhe niveli i zhurmës është brenda normave. Ne nuk kemi aparat matës për zhurmat. Ky ligj që po më tregoni është i paqartë për mua, sapo të konsultohem do marr masat”, shprehet ai.
Megjithatë, një udhëzim i vitit 2023 e ngarkon qartë Policinë Bashkiake me detyrën e matjes dhe verifikimit të zhurmave problematike, çka do të thotë se bashkia ka neglizhuar përgjegjësitë e saj.
Ndërkohë që institucionet “përplasen” për kompetenca, qytetari i Kuçovës vazhdon të jetojë mes zhurmës dhe pluhurit. Bashkia i beson vetëmonitorimeve të bizneseve, Agjencia Rajonale e Mjedisit nuk është njoftuar, dhe ISHP nuk është përfshirë.
E ndërsa ligji e thotë qartë kush duhet të veprojë, në praktikë zhurma duket se nuk dëgjohet nga askush… përveç qytetarëve.
/Emisioni “Fiks Fare”
