Në një deklaratë për mediat pas mbledhjes së Kryesisë së Partisë Demokratike,kreu i PD, Sali Berisha, paralajmëroi protesta dhe revolta, duke theksuar se me kryeministrin Edi Rama nuk mund të ketë zgjedhje të lira. Ai ritheksoi qëndrimin e tij, të shprehur më 11 maj 2025, se vota e lirë duhet t’u kthehet shqiptarëve me çdo kusht.
Berisha u shpreh se retorika e tij ka ndryshuar, duke theksuar se tani ajo bazohet në “pesë rezoluta ndërkombëtare” të cilat “damkosin Ramën si kryetar të një narkoshteti” dhe si një person që “zhvillon farsë elektorale”. Edhe pse pranoi se këto dokumente nuk kanë efekt të menjëhershëm, ai tha se ato do të kenë ndikimin e tyre në të ardhmen.
“Ne jemi të bindur se shqiptarët, dhe vetëm qytetarët shqiptarë, do mund t’ua rikthejnë votën e lirë qytetarëve shqiptarë,” tha Berisha, duke theksuar se roli i ndërkombëtarëve është vetëm mbështetës.
Lideri i opozitës u pyet edhe për një analizë të brendshme të partisë, duke thënë se ajo do të bëhet, por pa një datë fikse, për shkak të “disa problemeve në vazhdim”. Ai theksoi se kjo analizë do të jetë e hapur për të gjithë anëtarët dhe mbështetësit.
Sa i përket hyrjes në Parlament, Berisha konfirmoi se në mbledhjen e Kryesisë nuk pati asnjë kundërshtim ndaj këtij propozimi, duke shtuar se pati vetëm sugjerime për formatin. Ai u shpreh se ishte plotësisht dakord me propozimin e Ervin Salianjit, i cili sugjeroi që hyrja në Parlament të shoqërohet me protesta dhe revolta.
Berisha deklaroi se protestat do të nisin “në kohën më të shpejtë të duhur” dhe se opozita ndodhet përpara një “misioni të ri dhe të madh, misionit të shpëtimit të Shqipërisë nga diktatura autoritare”.
Në fund, Berisha tha se Partia Demokratike do të veprojë në përputhje me statutin e saj dhe se analiza e zgjedhjeve të fundit, por edhe e atyre të vitit 2023, do të kryhet, pavarësisht vështirësive që ai ka kaluar gjatë periudhës së arrestimit të tij. Ai hodhi poshtë idenë se ka dy standarde për pranimin ose jo të rezultatit, duke theksuar se “farsa është farsë, votimi është votim” dhe se “krimineli i zgjedhjeve është Edi Rama, dhe numri 2, Altin Troplini”.
