Lirohet nga detyra drejtuesja e Byrosë Kombëtare të Hetimit (BKH), Aida Hajnaj pas përfundimit të mandatit 5-vjeçar, duke i hapur rrugë zgjedhjes së kreut të ri. Këshilli i Lartë i Prokurorisë u mblodh sot në orën 11:00, dhe me 6 vota pro, vendosi për përfundimin e mandatit të Hajnajt.
Një anëtar i KLP-së mungoi ndërsa 4 të tjerë ishin të mendimit që mandati mbaronte sot, 1 shtator, dhe jo më 31 gusht. Erind Mërkuri, Sokol Stojani, Olger Eminaj dhe Erind Gërmenji votuan si datë të mbarimit të mandatit datën 1 shtator, ndërsa të tjerët Erjon Fejzulla, Arta Mandro, Zeqir Hoda, Ledina Rizaj, Mirela Bogdani dhe Vat Staka votuan që mandati i Hajnaj mbaroi më 31 gusht.
Lirimi nga detyra i hap rrugë zgjedhjes së drejtuesit të ri të institucionit, procedura për të cilin ka nisur prej muajit qershor dhe aktualisht gjen nën ethet e garës 7 kandidatë Andi Pogaçe, Artur Beu, Elton Kërluku, Gentian Ndoi, Gentjan Shehaj, Gledis Nano dhe Joni Keta. Deri në zgjedhjen e kreut të ri, BKH do të drejtohet nga zv.drejtori i kësaj Byroje, Joni Keta, i cili është njëherësh kandidat për të marrë drejtimin.
Kjo shtatëshe e kandidatëve kaloi fazat e komisionit përzgjedhës, përbërë nga 3 prokurorët e SPAK Altin Dumani, Arben Kraja dhe Behar Dibra, në një garë me 13 kandidatë. Ata iu nënshtruan testit për aftësitë fizike, esesë me shkrim dhe testit logjik, poligrafit dhe intervistës me gojë para komisionit.
Tashmë, i duhet të kalojnë në filtrin e një komisioni të dytë, atij për Verifikimit e Figurës dhe Pasurisë. Anëtarët e tij, gjyqtarja e posaçme Saida Dollani, 2 prokurorë të SPAK, Behar Dibra dhe Eneid Nakuçi, dhe dy hetues të BKH-së. Rreth tyre mblidhet informacion nga shërbimi sekret dhe institucione për pastërtinë e figurës përfshirë dhe rrethin familjarë të tyre, si dhe analizohen pasuritë e tyre bazuar mbi deklaratat pranë Inspektoratit të Lartë i Deklarimit dhe Kontrollit të Pasurisë. 7 kandidatët do të shortohen për t’u përcaktuar relatori nga anëtarët e Komisionit, i cili do të merret me secilin prej kandidatëve.
Pas këtij procesi, është sërish Komisioni i Përzgjedhjes, i përbërë nga treshja e SPAK, që përcakton kandidatin më të mirë, i cili më tej do t’i nënshtrohet një programi trajnimi dhe do t’i dërgohet për miratim Këshillit të Lartë të Prokurorisë.
Kandidatët e mbetur në garë për kreun e BKH:
- Andi Pogaçe
- Artur Beu
- Elton Kërluku
- Gentian Ndoi
- Gentjan Shehaj
- Gledis Nano
- Joni Keta
