Një rrjet kriminal i përbërë nga të moshuar – përfshirë një 73-vjeçar, një 72-vjeçar dhe një “bos” 65-vjeçar – është goditur nga policia greke, pas një operacioni spektakolar në Kretë dhe Greqinë Veriore. Organizata, e cila kishte ngritur një skemë të sofistikuar për të trafikuar municione nga Shqipëria, funksiononte me një disiplinë ushtarake dhe përfitime të majme.
Sipas Prothothema, rrjeti ishte aktiv të paktën që nga prilli 2025 dhe kishte për qëllim importin dhe shitjen e fishekëve në tregun e zi të Kretës, duke përdorur një kamion të regjistruar në emër të një personi të vdekur. Municionet futeshin fshehurazi në Greqi, përmes një ndarjeje speciale të ndërtuar brenda kamionit.
Në total, 24,126 fishekë, një pushkë luftarake dhe disa automjete, përfshirë një motoçikletë që përdorej për shpërndarje “VIP” të municioneve, janë sekuestruar gjatë operacionit.
Si funksiononte rrjeti?
65-vjeçari, “truri” i operacionit, grumbullonte porositë dhe i shpërndante fishekët me motoçikletë në Kretë. Ai kishte qenë i arrestuar edhe më parë, në 2019, për trafik armësh.
72-vjeçari kishte ndërtuar fshehtësinë brenda kamionit dhe drejtonte automjetin deri në kufi.
73-vjeçari ishte shoferi i kamionit për segmentin e gjatë drejt Kretës.
41-vjeçari shqiptar kujdesej për sigurimin dhe dorëzimin e municioneve nga Shqipëria.
30-vjeçari i arrestuar në Kretë ishte klient i rregullt – një tjetër hallkë në rrjetin e shpërndarjes.
Të dyshuarit udhëtonin në mënyrë sekrete, duke çaktivizuar celularët, përdorur dokumente të falsifikuara, dhe bileta trageti me identitete të rreme, për të shmangur çdo ndjekje nga autoritetet.
Fundi spektakolar i “kamionit të vdekjes”
Tre anëtarët e organizatës u arrestuan në Kretë, në flagrancë, sapo kishin marrë dërgesën e radhës nga kufiri. Në të njëjtën kohë, në një tjetër cep të Greqisë – në Kostur – oficerët grekë vunë në pranga 41-vjeçarin shqiptar.
Operacioni është përshkruar nga policia si një nga më të sofistikuarit vitet e fundit në fushën e trafikut të municioneve dhe armëve të lehta, me theks të veçantë në lidhjet ndërkufitare Shqipëri–Greqi.
Autoritetet janë në kërkim të furnizuesit shqiptar dhe po hetojnë më tej nëse fishekët janë përdorur apo kanë qenë të destinuar për organizata kriminale në Kretë apo më gjerë.
