Nga Maska.al
Avokati Altin Goxhaj është një ndër figurat më të zëshme të dekadës së fundit, i njohur për angazhimin e tij në çështje me profil të lartë, shpesh kundër linjës zyrtare dhe në mbrojtje të lirive qytetare.
Me një karrierë që kalon përtej sallave të gjyqit, Goxhaj ka ndërtuar imazhin e një avokati rebel, kritik ndaj pushtetit, sistemit gjyqësor dhe partive tradicionale.
Ndër çështjet më të bujshme ku ai është përfshirë përmenden ato kundër vaksinimit të detyruar gjatë pandemisë, mbrojtja e të drejtave të prindërve në sistemin arsimor, dhe paditë ndaj autoriteteve publike për shkelje të të drejtave themelore.
Së fundmi, kreu i Aleancës Konservatore për Shqipërinë, Goxhaj ka bërë një hap tjetër: kandidimin për deputet përmes listave të hapura, një nismë që ai e ka promovuar si mënyrë për t’ia kthyer qytetarëve kontrollin mbi politikën.
Kandidatura e Altin Goxhajt në Listën e Hapur të Qarkut Tiranë në Koalicionin “Aleanca Për Shqipërinë Madhështore”, shihet si një test i vërtetë për pjekurinë politike të shoqërisë shqiptare, por edhe si një provë për vetë sistemin zgjedhor, i cili është shpesh akuzuar për mungesë transparence dhe demokracie reale.
