Një aksident rrugor është regjistruar këtë të mërkurë në aksin drejt Rinasit, ku është përfshirë një automjet që i përket shtabit elektoral të kandidatit të Partisë Demokratike për deputet në qarkun e Tiranës, Ilir Alimehmeti.
Ngjarja ndodhi pas një manovre të gabuar të një mjeti të tretë, çka çoi në përplasjen e dy automjeteve, mes tyre dhe atij që transportonte një pjesëtare të stafit të Alimehmetit.
Vetë kandidati demokrat, i ftuar në “News24”, konfirmoi incidentin, duke bërë me dije se nuk ka të lënduar rëndë.
“Fatmirësisht të gjithë janë mirë. Një pjesëtare e shtabit tim u përfshi në aksident. Uroj të jetë shumë mirë, por jam i qartë se nuk ka dëmtime serioze në njerëz nga përplasja. Me sa na kanë shpjeguar, një makinë e tretë bëri një manovër të gabuar, shoferët janë trembur dhe për të shmangur atë, janë përplasur dy makinat e tjera, mes tyre dhe ajo e shtabit tim,” u shpreh Alimehmeti.
