Policia e Tiranës ka arrestuar Edmir Durakun, djalin e biznesmenit të njohur Shyqyri Duraku, pasi ai është kapur me një sasi kokaine.
Burime policore nuk kanë dhënë ende detaje të plota mbi arrestimin, ndërsa mësohet se ai është paraqitur këtë të hënë në Gjykatën e Tiranës, në dhomën penale për caktimin e masës së sigurisë sipas vna.
Edmir Duraku është djali i biznesmenit Shyqyri Duraku, i cili zotëron pesë kompani kryesisht në sektorin e përpunimit të naftës dhe hoteleri-turizmit. Ai është gjithashtu vëllai i ish-deputetes së Partisë Socialiste, Gerta Duraku.
E kaluara e Edmir Durakut
Nuk është hera e parë që emri i Edmir Durakut del në vëmendjen e organeve ligjzbatuese. Në shtator të vitit 2012, ai ishte në qendër të një tjetër çështjeje të bujshme, kur Kreshnik Ymeri, një 28-vjeçar, u arrestua nga policia e Tiranës, pasi akuzohej se e kishte kërcënuar atë me gjobë.
Në atë kohë, Ymeri u kap në flagrancë në rrugën “Don Bosko”, ndërsa sipas policisë ai i kishte dërguar mesazhe kërcënuese Edmir Durakut, duke i kërkuar 100 mijë euro.
Gjithashtu, më 13 gusht 2012, makina e Edmir Durakut u hodh në erë nga persona të paidentifikuar, ngjarje që ndodhi pranë kompleksit turistik “Vila Duraku” në Sarandë, ku ai ishte pronar.
Ndaj Edmir Durakut tashmë pritet të zhvillohet procesi gjyqësor për arrestimin e tij të fundit, ndërsa organet e drejtësisë nuk kanë bërë ende të ditura akuzat e plota dhe detajet mbi rrethanat e arrestimit. /korrieri
