Detaje tronditëse kanë dalë në dritë në lidhje me vrasjen makabre të 24-vjeçares palestineze, Rayyan Alwan, e cila u gjet e pajetë disa ditë më parë në një banesë me qira në rrugën e Kavajës, Tiranë. Fillimisht, autori i dyshuar u raportua si bashkëshorti i saj, por autoritetet shqiptare kanë konfirmuar se 49-vjeçari Fadi Alwan është në fakt babai i viktimës.
Sipas medias holandeze “De Telegraaf”, Alwan dyshohet se ka përdhunuar të bijën përpara se ta vriste. Pas krimit, ai është larguar nga Shqipëria më 22 shkurt, duke u arratisur në një drejtim të panjohur. Burime nga grupi hetimor bëjnë me dije se ka dyshime që ai mund të jetë fshehur në Amsterdam, kryeqytetin e Holandës.
Si ndodhi ngjarja?
Dy palestinezët, të cilët jetonin në Gjermani, mbërritën në Shqipëri më 19 shkurt, duke udhëtuar nga Gjermania në Rinas me dokumente greke. Pas daljes nga aeroporti, ata morën me qira një banesë në rrugën e Kavajës. Pamjet filmike të kamerave të sigurisë tregojnë se më 22 shkurt, 49-vjeçari është parë duke u larguar nga zona e ngjarjes dhe më pas është nisur drejt Rinasit, ku ka fluturuar në një destinacion ende të paidentifikuar.
Hetimet vijojnë
Autoritetet shqiptare janë duke punuar për zbardhjen e plotë të rrethanave të kësaj ngjarjeje të rëndë, ndërsa pritet që ekspertiza mjeko-ligjore të përcaktojë detajet e sakta të vdekjes së 24-vjeçares. Në të njëjtën kohë, kërkimet për lokalizimin dhe arrestimin e 49-vjeçarit vijojnë, me dyshime të forta se ai mund të ketë gjetur strehim në Holandë.
Ngjarja ka tronditur opinionin publik, ndërsa autoritetet vijojnë përpjekjet për të sjellë para drejtësisë autorin e dyshuar të këtij krimi makabër.
