Ish-drejtori i Radio Televizionit Shqiptar, Thoma Gëllçi, tashmë gjendet në SHBA dhe jeton i qetë si shtetas amerikan, por në Shqipëri ai vazhdon të mbetet lajm.
Në një prononcim të kryeministrit Rama në Grupin Parlamentar socialist, Gëllçi dhe avokati i tij u përmendën për një vendim të fundit të Gjykatës Europiane të të Drejtave të Njeriut (GJEDNJ), që kishte nxjerrë të paligjshëm arrestimin e tij dhe zgjatjen e “arrestit me burg” të pajustifikuar.
Thoma Gëllçi u arrestua dhe akuzua nga SPAK në 2021 për “Shpërdorim detyre” bashkë me 3 ish-punonjës të RTSH për një tender të vitit 2018, për blerje pajisjesh televizive. Tenderi në shumën 87 milionë lekë të reja u fitua nga kompania “TBS 96”, ndërsa kompania “EURO KONTAKT” u skualifikua se nuk përmbushte kushtet. “EURO KONTAKT”, me pronar Gent Prizreni, e pakënaqur nga skualifikimi e kallëzoi në SPAK Thoma Gëllçin dhe tre ish-vartësit e tij për këtë “padrejtësi” që iu bë.
Gent Prizreni njihet si ish-bashkëshorti i Jonida Maliqit, por nuk është përmendur asnjëherë se ishte pikërisht ai, një nga denoncuesit e parë që vendosën në “sprovë” drejtësinë “speciale” të SPAK.
SPAK dhe GJKKO iu përgjigjën denoncuesit “VIP” dhe e arrestuan funksionarin e parë VIP, drejtorin e RTSH, në erën që i dha fund “pandëshkueshmërisë”. Thoma Gëllçit iu pre fleta e arrestimit nga prokurorja e “hekurt” Doloreza Musabelliu, në kohën kur drejtues i SPAK ishte Arben Kraja. Gëllçi u mbajt në burg për 8 muaj, nga e njëjta prokurore që përmendet në bisedat e komunikimet “SKY” për pazare me dosjet.
Arrestimi dhe mbajtja në burg e Thoma Gëllçit u trumbetua si një arritje e madhe e SPAK, por GJEDNJ me vendimin e fundit na tregon për të kundërtën. Mbajtja në burg e ish drejtorit të RTSH për hetime që filluan nga një kallëzues VIP ishte e padrejtë. Kërkesat e vazhdueshme për hetim në gjendje ‘jashtë qelisë’ u refuzuan nga prokurorja Doloreza Musabelliu dhe disa gjyqtarë të GJKKO, njëri prej tyre është Erjon Bani, me hotel dhe pallat në Sarandë.
Dosja “Gëllçi” pritet të ketë zhvillime shumë të forta në vijim, jo vetëm për masat e sigurisë që i hodhi poshtë Gjykata Europiane e të Drejtave të Njeriut. Të dhëna që pritet të konfirmohen me dokumente zyrtare hedhin dyshime për një manipulim të rëndë të bërë nga prokuroria me këtë çështje.
Vërtetimi i tyre do trondiste të gjithë godinën e SPAK dhe besimi popullor për ndershmërinë dhe profesionalizmin e tij do shembej që me çështjen e parë të bujshme, me arrestimin dhe mbajtjen në burg të të akuzuarit të pare “VIP”.
