Trafiku është paralizuar totalisht mesditën e sotme në zonën e Kinostudios, Freskut dhe Tufinës, vetëm rreth 200 metra larg godinës së Policisë Rrugore në Tiranë.
Drejtues mjetesh raportojnë radhë të gjata automjetesh, lëvizje shumë të ngadalta dhe bllokim pothuajse të plotë të qarkullimit në disa akse kryesore që lidhin këto zona me pjesën tjetër të kryeqytetit. Situata ka krijuar irritim te qytetarët, të cilët kanë mbetur të bllokuar.
Ironikisht, bllokimi ndodh shumë pranë Policisë Rrugore, pa pasur një prani të dukshme të efektivëve për të normalizuar situatën.
Qytetarët kërkojnë reagim të shpejtë nga autoritetet për të shmangur përsëritjen e kaosit, i cili është kthyer në problem të përditshëm në këtë zonë të Tiranës.
