Partizani B ka siguruar shërbimet e një prej talenteve më premtues shqiptarë, Jamie Noreci, i cili tashmë është zyrtarisht pjesë e ekipit.
Mesfushori 18-vjeçar, i ardhur nga eksperienca në Angli te Burnley FC, shihet si një afrim me perspektivë të lartë për të ardhmen e klubit. Noreci ka tërhequr vëmendje me paraqitjet e tij dhe konsiderohet një lojtar me potencial të madh zhvillimi.
Në nivel ndërkombëtar, ai ka marrë ftesën e parë nga Shqipëria U-19, duke konfirmuar vlerësimin që ka në rritje në radhët e futbollit shqiptar. Më herët, ai ka qenë pjesë edhe e moshave më të vogla të kombëtares.
Zgjedhja e tij për të përfaqësuar Shqipërinë ka qenë gjithmonë e qartë, e ndikuar edhe nga lidhja e fortë familjare me fanellën kuqezi, ku babai i tij është një tifoz i njohur dhe i përkushtuar i kombëtares.
Transferimi te Partizani B përfaqëson një hap të rëndësishëm në karrierën e Norecit, i cili pritet të zhvillohet më tej dhe të synojë kalimin në ekipin e parë të Partizani Tirana në të ardhmen e afërt.
Me këtë lëvizje, klubi vijon të investojë te talentet e reja, duke ndërtuar një bazë të fortë për suksesin e së ardhmes.
