Detaje të reja janë zbardhur nga hetimet që po kryhen nga autoritetet italiane për vdekjen e 46-vjeçares, Fabiana Piccioni. Ajo u gjet e vdekur dhe gjysmë e djegur më 9 janar në Giulianova.
Mësohet se hetimet kanë marrë një pikë kthese dhe një i dyshuar për ngjarjen e rëndë është një mik i viktimës, një 52-vjeçar shqiptar.
Më tej bëhet me dije se shqiptari nuk ka asnjë precedentë penalë dhe është pronar i një kompanie pastrimi. Pas zhdukjes së Piccionit, dyshohet se ai u kthye në vendin e tij dhe tani autoritetet janë në gjurmët e shqiptarit. Ai po hetohet për trafik droge, vdekje si pasojë e një krimi tjetër dhe tentativë për fshehje të kufomës.
Hetuesit raportuan se prokuroria ka kryer një sërë kontrollesh dhe sekuestrosh. Dyshimi i fortë lidhet me aktivitetet e 52-vjeçarit që la shtëpinë dhe ambientet e biznesit në Mosciano Sant’Angelo të cilat shërbejnë si magazinë për kompaninë e tij. Hetuesit pyetën gjithashtu miq dhe dëshmitarë në përpjekje për të hedhur dritë mbi orët e fundit të jetës së Fabianës.
Piccioni u zhduk nga shtëpia më 2 janar. Asgjë më shumë nuk u dëgjua për të derisa trupi i saj u gjet më 9 janar në Giulianova, në një mjedis në Via Cavoni, në pjesën e sipërme të qytetit. Gruaja u gjet lakuriq dhe gjysmë e djegur. Piccioni vdiq pasi mori një përzierje kokaine dhe opiate që e bëri atë të ndihej e sëmurë. Ka qenë i dyshuari shqiptar që mendohet se i ka dhënë viktimës dozën fatale. Burri më pas dyshohet se u përpoq të asgjësonte trupin e saj.
