Autori i vrasjes së 14-vjeçarit Martin Cani ka dhënë më shumë detaje për sherrin me bashkëmoshatarin, të cilit i mori edhe jetën. Mario Prelleshi, gjatë marrjes në pyetje nga efektivët e Policisë së Shtetit, është shprehur ka nisur vetëm për “një shikim”. Sipas tij, të dy ishin konfliktuar të premten për mënyrën sesi viktima po e shihte. Atë ditë e kishin lënë për t’u “sqaruar”, por ishin përplasur sërish të hënën brenda ambienteve të shkollës. Pas sherrit të ndodhur gjatë pushimit të gjatë, 14-vjeçari tregoi se të dy kishin thirrur shokët për të vazhduar përplasjen.
“Jemi zënë të premten sepse po më shikonte. E kishin lënë për t’u sqaruar. Pastaj jemi zënë sërish të hënën. Ai lajmëroi shokët si dhe unë shokët e mi. Gjatë përleshjes ndodhi ajo që ndodhi,”-tregoi ai. Por nuk tha asnjë fjalë kur u pyet nëse ishte penduar për faktin se i kishte marrë jetën një personi. Madje ka heshtur edhe kur është pyetur sesi e kishte futur thikën në shkollë. Për këtë pikë të marrjes në pyetje, është shprehur se e kishte fshehur diku afër shkollës.
Ngjarja e rëndë që tronditi vendin ka ndodhur dy ditë më parë. Të rinjtë ishin konfliktuar gjatë pushimit të gjatë, por ishin ndarë nga roja i shkollës dhe mësuesit. Disa orë më pas, rreth orës 13.00, kur edhe kishin përfunduar mësimin, u ritakuan në oborr. Viktima, Cani kishte kërkuar ndihmë nga shoku i tij, Luis Meçe, i cili nga një shkollë tjetër kishte shkuar tek “Fan Noli”. Kështu mes të treve nisi një konflikt që përfundoi me përdorimin e thikës. Tashmë, për ngjarjen, nesër në orën 11.00 është parashikuar një protestë që do të nisë nga shkolla “Fan Noli” dhe do të përfundojë tek Ministria e Arsimit.
