Katër persona akuzohen nga policia si të implikuar në vrasjen e 36-vjeçarit Elis Rroshkodoli, ndodhur më 30 Gusht, në një lokal në lagjen “Ahmet Haxhia” në Shkodër.
Një prej të akuzuarve është arrestuar, ndërsa tre të tjerë janë shpallur në kërkim.
Hetimet e kryera nga policia e Shkodrës nën drejtimin e prokurorisë së rrethir, në bashkëpunim me policinë e Tiranës zbuluan një garazh në territorin e bashkisë Tiranë, që iu shërbente 4 shtetasve, si bazë kriminale për të fshehur automjete të trafikuara, të cilat do të përdoreshin gjatë kryerjes së krimeve.
Gjatë bastisjen në garazh, janë sekuestruar 3 automjete të trafikuara nga shtete të ndryshme të Europës dhe pjesë të automjetit të përdorur nga autorët, gjatë vrasjes së Elis Rroshkodolit.
Aksioni
Në kuadër të aksionit të koduar “Fjalëkryqi”, në pranga u vu Xhulio Malo, 26 vjeç, për veprat penale “Sigurimi i kushteve dhe i mjeteve materiale për të kryer vrasje”, “Veprime që pengojnë zbulimin e së vërtetës” dhe “Trafikimi i mjeteve motorike”, kryer në bashkëpunim.
Gjithashtu, u identifikuan dhe u shpallën në kërkim, për veprat penale “Vrasja me paramendim”, “Sigurimi i kushteve dhe i mjeteve materiale për të kryer vrasje”, “Mbajtja pa leje dhe prodhimi i armëve, armëve shpërthyese dhe i municionit” dhe “Trafikimi i mjeteve motorike”, kryer në bashkëpunim, shtetasit J. Xh., 31 vjeç, V. Xh., 38 vjeç dhe D. M., 42 vjeç.
Nga hetimet dyshohet se këta 4 persona kanë organizuar dhe kanë kryer vrasjen e shtetasit E. Rr. (Sh.).
Në vijim të operacionit, në bashkëpunim me shërbimet e DVP Tiranë, u zbulua në territorin e bashkisë Tiranë, një garazh, ku këta 4 shtetas mbanin automjete të trafikuara nga shtete të ndryshme të Europës, të cilat dyshohet se janë siguruar për të shërbyer gjatë kryerjes së krimeve të rënda kundër personit.
Nga kontrollet në këtë ambient u gjetën dhe u sekuestruan në cilësinë e provës materiale 3 automjete të dyshuara të trafikuara dhe pjesë të automjetit të dyshuar të përdorur nga autorët, gjatë vrasjes së Elis Rroshkodolit.
Grupi dyshohet se ka vepruar me pagesë.
Vrasja
Viktima, Elis Rroshkodoli, mori 14 plumba në trup, nga 18 që u gjetën në vendin e ngjarjes. Autori ka qenë i maskuar dhe ka qëlluar me plumba në drejtim të Rroshkodolit. Pas vrasjes autori është larguar nga aty me një makinë, itinerari i të cilës është ndjekur nëpërmjet kamerave të sigurisë nga hetuesit.
Rroshkodoli është emër i njohur për autoritetet, pasi është me precedentë penal në fushën e vjedhjeve dhe krimeve kundër jetës.
Në vitin 2010 dyshohet se Elis Rroshkodoli ka plagosur me armë zjarri shtetasin Hysni Bregu. Më pas në vitin 2014 dyshohet se është përfshirë në një vjedhje në Belgjikë, i arrestuar bashkë me një grup shqiptarësh. Po në Belgjikë dyshohet se ka plagosur një shtetas.
Në vitin 2023, është autor i dyshuar për plagosjen e një rumuni në Rumani nga ku është arratisur drejt Stambollit. Ndërkohë policia përveç këtyre ngjarjeve ka mësuar edhe disa konflikte të tjera ku dyshohet se është përfshirë viktima.
I arrestuari
Xhulio Malo, një person që kishte disa kohë që ka dalë nga burgu është arrestuar sërish nga policia, pasi rezulton se është përfshirë duke bashkëpunuar me tre shtetas të tjerë që kryen vrasjen e Elis Roshkodolit.
Malo rezulton i dënuar me 10 vite burg nga gjykata e Krimeve të rënda, si pjesë e grupit të Alikove në Lazarat, të cilët vranë punonjësin e policisë RENEA, Ibrahim Basha.
Xhulio Malo, është arrestuar dhe proceduar nga prokuroria e Shkodrës për akuzën e “Sigurimi i kushteve dhe i mjeteve materiale për të kryer vrasje”, “Veprime që pengojnë zbulimin e së vërtetës” dhe “Trafikimi i mjeteve motorike”, kryer në bashkëpunim.
Në rrjetet sociale, ai ka postuar edhe fotografi të xhihadistëve të ISIS.
Në një tjetër foto, ai shfaqet mes një parcele kanabisi.
