Detaje të reja janë zbuluar mbi ngjarjen e rëndë të ndodhur pasditen e së martës në zonën e Komunës së Parisit, ku një 36-vjeçar humbi jetën pas një konflikti me kolegun e tij në ambientet e lokalit ku punonin të dy, “City Lounge”.
Sherret mes picierit dhe kuzhinierit ishin të vazhdueshme, ndërsa 41-vjeçari pretendonte se viktima e bullizonte.
Sipas njoftimit zyrtar të Policisë së Shtetit, pas veprimeve hetimore, shërbimet e Komisariatit Nr. 2 në bashkëpunim me Forcën e Posaçme “Shqiponja” kanë gjetur dhe sekuestruar mjetin prerës (thikën) me të cilin dyshohet se u krye vrasja.
Autori i dyshuar, Filip Shehu, 41 vjeç, u arrestua në flagrancë menjëherë pas ngjarjes, ndërsa nga verifikimet ka rezultuar se ai është i dënuar më parë për veprën penale “Prodhimi, mbajtja, blerja apo shitja pa leje e armëve të ftohta”.
Viktimë e këtij konflikti mbeti Indrit Ismaillari.
Policia vijon hetimet për zbardhjen e plotë të rrethanave të krimit, ndërsa materialet procedurale i janë referuar Prokurorisë së Tiranës për veprime të mëtejshme.
