Vrasja e Arben Lleshit në burgun e Peqinit nga Sokol Mjacaj vijon të ketë dy mistere: si është futur arma e zjarrit në burgun e sigurisë së lartë dhe arsyen reale që i dënuari me burgim të përjetshëm ekzekutoi një tjetër të dënuar me 32 vjet burg.
Gazetarja Glidona Daci në emisionin “Open” tha se Mjacaj nuk ka pasur asnjë konflikt dhe asnjë njohje me Lleshin, çka sipas saj, ngre dyshimet se kemi një krim të porositur apo me pagesë.
“Mjacaj nuk ka pasur kontakte të mëparshme, as konflikte me Lleshin. E ka njohur ndoshta në ajrim por jo se kanë pasur shoqëri apo konflikte, ndaj dhe ka dyshime se vrasja është me pagesë.
Armën e zjarrit, sipas hetimeve dhe dëshmive të mbledhura nga grupi hetimor, Mjacaj e fshihte në tualetin e qelisë së tij. Mister mbetet se si është futur arma në burgun e sigurisë së lartë, megjithëse kemi paralajmërimet e drejtorit të komanduar të burgut që njoftonte se skaneri nuk punonte, madje për disa ditë edhe kamerat”, tha Daci.
