Një bashkim mes kompanive Europetrol Durrës Albania dhe Bitex Refinery janë shpallur fituese të ankandit për blerjen e 101 mijë tonëve naftë bruto nga Albpetrol. Dokumentat zyrtare të publikuara nga Albpetrol tregojnë se dy kompanitë e blenë sasinë e naftës me një çmim prej 0.0105 dollarë ose 1 cent për fuçi mbi çmimin dysheme.
Nafta që Albpetrol shet del në ankand me një çmim dysheme. Këtë herë ky çmim ishte përcaktuar sipas formulës 77.45 % e Çmimit Brent – 4.07 USD/bbl + K. Ky është çmimi, nën të cilin ofertat nuk pranohen dhe skualifikohen automatikisht.
Në formulën dysheme, Brent përfaqëson çmimin në USD/fuçi i Brent i Platts, -4.04 USD/fuçi është kosto mesatare totale (transport, magazinim, stokim, analizim produkti, sigurim), ndërsa K është vlera USD/fuçi e ofruar nga ofertuesi mbi çmimin minimal të shitjes. Pra, koefiçienti K është elementi i vetëm i çmimit ku garohet.
Sa më e lartë një kompani të ofrojë koefiçentin K aq më i lartë del çmimi dhe aq më shumë para fiton Albpetrol nga shitja e naftës. Por në këtë rast, Europetrol e Frident Kuqit dhe Bitex e Likometave kanë ofruar koeficientin 0.105 dollarë ose 1 cent për fuçi me çmimin dysheme të përcaktuar nga Albpetrol. Në total, vlera që do të paguajnë dy kompanit për të gjithë sasinë 101 mijë tonë është rreth 31 milionë euro.
Njoftimi i fituesit te ankandit
Dy kompanitë me sa duket kanë qenë të sigurta se do ta fitonin ankandin edhe në kokë të çmimit dysheme pasi ato ishin oferta e vetme në ankand. Sasia prej 109 mijë tonësh që Albpetrol nxorri për shitje në ankand vjen nga nafta e prodhuar nga vetë shoqëria shtetërore, por edhe sasitë që ajo merr nga kompanitë koncesionare si Bankers Petroleum.
Për shumë kohë, Albpetrol e merrte tarifën e vet të prodhimit paraekzistues në para. Por nga vitet 2010, ligji u ndryshua në Parlament dhe kompanitë koncesionare u detyruan ta paguanin prodhimin paraekzistues të puseve me sasi nafte.
Që nga ajo kohë, Albpetrol e shet naftën në ankande me çmime dukshëm poshtë bursave dhe shumë poshtë atij që shesin kompanitë koncesionare, ndonëse është e njëjta cilësi nafte.
