Kur çeli fushatën elektorale të 11 Majit, Rama zgjodhi të organizonte një ‘aheng madhëshor’ në Sheshin ‘Skënderbej’.
Mirëpo, kjo festë e organizuar nga Rama dhe kompania e tij, u pa disi edhe si karshillëk ndaj Veliajt, pasi vallet e këngët kumbuan para Bashkisë së Tiranës që ai drejtonte para se të futej në burg.
Nga qelia e burgut, Veliaj ka bërë një reagim për fitoren e PS-së që më shumë si falënderim, duket si një tentativë për ta bërë veten pjesë të fitores, edhe pse Rama nuk e përfshiu.
Ky reagim i Veliajt, që përmend kontributin e tij në PS, shihet si një festë ‘në heshtje’ dhe vetmitare, edhe pse heshtja e vetë Ramës ndaj tij, ishte ndoshta më e zhurmshme se çdo fjalë.
“Miqtë e mi, Nuk di nga t’ia nis. Jam pa fjalë, krejtësisht pa fjalë, përpara kësaj vale të jashtëzakonshme mbështetjeje që fshiu çdo dyshim, çdo pretendim, çdo helm e çdo baltë që iu hodh Partisë Socialiste në këto katër vite.
Shqiptarët folën – dhe folën fort! Folën më fuqishëm se çdo herë tjetër, që prej vitit të mbrapshtë 1997, kur i treguan vendin të njëjtit personazh grotesk që guxon të rikthehet përpara shqiptarëve, edhe sot, si të ishte një “ofertë e re”.
Një gjë kam mësuar unë për shqiptarët: nuk harrojnë dhe nuk mashtrohen.
Ata nuk i besojnë më Saliut & co dhe 11 maji i vuri vulën këtij diskutimi.
Shqiptarët dinë të vlerësojnë ndryshimin, punën, zhvillimin dhe e dinë fare mirë që ka vetëm një forcë në këtë vend që mund ta çojë Shqipërinë përpara drejt Europës që kemi ëndërruar: Partia Socialiste e drejtuar nga Edi Rama dhe ekipi i tij.
Saliu & co nuk kanë vesh ta dëgjojnë zërin e popullit. Nuk kanë pasur kurrë sepse nuk e duan pushtetin për popullin. Që nga viti 2013 e deri sot, pas çdo humbjeje, kanë folur për vjedhje, për komplot, për një popull që nuk i meriton.
Por, nëse ka një gjë që na dallon ne socialistëve nga rivalët tanë është se ne dimë të dëgjojmë. Ne nuk jemi këtu për veten tonë – ne jemi këtu për të punuar, për të ndërtuar një të ardhme më të mirë për të gjithë shqiptarët.
Sot, unë jam krenar që jam pjesë e këtij projekti që ka transformuar Shqipërinë. Jam krenar që kam dhënë një kontribut, sado modest, në këtë rrugëtim të jashtëzakonshëm që qytetarët e mbështetën masivisht në 11 maj me votën e tyre.
Sot ndihem i përunjur përpara kësaj mbështetje masive e dua të falenderoj secilin prej jush, nga veriu në jug, nga lindja në perëndim, nga Amerika në Greqi, nga Anglia në Turqi, që i besuan Partisë Socialiste.
Por, më lejoni që falenderimin më special ta ruaj per Tiranën time të dashur. Për familjen time të dytë. Për kolegët e mi të Bashkisë Tiranë dhe për ekipin e mrekullueshëm të Partisë Socialiste në Tiranë që me punën e përkushtimin e tyre arritën një fitore të paharrueshme.
Jeni të jashtëzakonshëm. Jam krenar për të gjithë ju!”, shkruan Veliaj në Facebook.
