Ilvi Meta 31 vjeç humbi jetën më 4 Maj 2022 brenda Komisariatit të Policisë së Kavajës ku u vetëvar. I riu ishte arrestuar si i dyshuar për vjedhje banese, por teksa mbahej i ndaluar në në dhomat e shoqërimit të Komisariatit të Kavajës, vari veten me litar.
Emisioni “Uniko” e ka trajtuar këtë histori me dëshmi dhe prova nga dosja hetimore. Bexhet Berberi, punonjës i patrullës në Policinë e Kavajës, u arrestua së bashku me 2 policë të tjerë për shpërdorim detyre për vetëvarjen e Ilvi Metës.
“Unë atë ditë kam qenë turni i dytë. Shkova në komisariat në orën 14:00. Mora shërbimin dhe një person ishte i shoqëruar. Kur ka një person të shoqëruar, rri një punonjës policie për 1 orë, 2 orë, 3 orë deri sa të arrestohet ose të nxirret. Në ato momente aty isha unë në shërbim. Nga ora 14:00 deri në orën 16:00 unë kam qëndruar me të ndjerin Ilvi Meta te dhomat e shoqërimit.
Në orën 16:00 njofton oficeri, e mora e çova te OPGJ-ja Novruz Duro, 10 metra larg. Novruzi i komunikoi urdhrin e arrestit se thotë kanë dalë shenjat e gishtave nga gjykata për vjedhje banesash. I bëri procesverbalin për sende të palejuara që ka me vete, e kontrolloi edhe Novruzi edhe unë dhe i shkruajti procesverbalin që nuk ka sende të palejuara me vete.
Kontrolli i tretë. Unë nuk futem brenda pastaj, unë iki dal në qytet. Nga ora 16:10, unë kam dalë në qytet deri në orën 19:30 që ka ndodhur ngjarja”, thotë ai.
Oficeri Bexhet Berberi tregon edhe se si e mësuan kur 31-vjeçari u vetëvar.
“E morëm vesh sepse njoftoi salla, oficeri. Njoftoi patrullën e parë nr.1, unë isha patrulla nr.2. Tha urgjent në komisariat se personi ka varur veten.
E kanë marrë patrulla, e ka çuar te spitali. Në ato momente shkuam edhe ne te spitali. Unë nuk e kam transportuar. Shkuam te spitali, aty vjen komandanti, shefi i rendit. Thanë nuk ka shenja jete. Pastaj unë ika, dola në qytet”.
