51-vjeçari Agim Jazaj që mbeti i plagosur paraditen e së hënës sapo doli nga xhamia Xhura në kryeqytet, është marrë në pyetje nga policia lidhur me ngjarjen.
Përpara hetuesve ai ka deklaruar se autorin, Saimir Xhafa e ka njohur për shkak të besimit, por më pas mes tyre kanë lindur disa zënka për motive banale.
Ky version është pohuar dhe nga dëshmitarët e ngjarjes, të cilët kanë deklaruar në polici se mes të plagosurit dhe autorit të shpallur në kërkim, kohët e fundit ka patur zënka të vazhdueshme.
Burime për Tv Klan pranë uniformave blu bëjnë me dije se konflikti mes tyre nuk ishte referuar nga asnjëra palë në polici, çka mund të shmangte përdorimin e armës, siç ndodhi mëngjesin e 1 Janarit.
Gjithçka nisi në ambientet e brendshme të xhamisë, ku mes tyre nisi një përplasje verbale, derisa dolën jashtë dhe 36-vjeçari Saimir Xhafa mori pistoletën që mbante në makinë dhe qëlloi Agim Jazajn.
Për autorin policia ka vënë një shpërblim prej 5000 Eurosh, me qëllim lokalizimin dhe kapjen e tij, si dhe ka shpërndarë foton me veshjen që mbante ditën që kreu ngjarjen.
