Një tjetër emër i njohur është përfshirë në operacionin e gjerë antidrogë të ndërmarrë sot nga SPAK, që goditi një rrjet të strukturuar kriminal të njohur si “Grupi i Pojës”. Mes të ndaluarve është edhe Nexhmedin Danaj, bashkëshorti i Algerta Fejzullës, ish-drejtoreshë në administratën e “Rilindjes” dhe një emër i njohur në qarqet politike të qeverisë.
Sipas burimeve zyrtare, Danaj është një nga personat kyç në aktivitetin ndërkombëtar të trafikut të drogës, që përfshinte rrugë kalimi nga Shqipëria drejt vendeve të Bashkimit Europian. Në kuadër të këtij hetimi të zgjeruar, SPAK ka dokumentuar 40 episode të trafikut ndërkombëtar të lëndëve narkotike, të lidhura me tre organizata kriminale që bashkëpunonin ndërmjet tyre.
Operacioni u zhvillua në disa qytete brenda dhe jashtë vendit, me dhjetëra urdhër-arreste të lëshuara dhe me bashkëpunim të agjencive partnere në Europë. Nexhmedin Danaj rezulton të ketë qenë aktiv në logjistikën dhe financimin e transportit të drogës.
Nga ana tjetër, lidhja e tij familjare me Algerta Fejzullën – që më herët ka mbajtur poste drejtuese në administratën publike – hedh hijet e para të dyshimeve mbi ndikimin e rrjeteve politike dhe klienteliste në mbështetjen ose mbrojtjen e aktivitetit kriminal.
SPAK ka deklaruar se hetimet janë në vijim dhe pritet që në orët në vijim të ketë më shumë të dhëna për përmasat e plotë të aktivitetit të grupit.
