Presidenti i SHBA-së, Donald Trump, deklaroi se presidenti rus Vladimir Putin dhe presidenti ukrainas Volodymyr Zelensky mund të takohen “shumë shpejt” për të diskutuar përfundimin e luftës midis dy fqinjëve.
Kur u pyet nga një gazetar në Zyrën Ovale nëse Putin dhe Zelensky kishin rënë dakord për një samit, Trump u përgjigj se “ka shumë mundësi që ta bëjnë”.
“Nuk kemi vendosur ende se ku, por patëm diskutime shumë të mira me presidentin Putin… Ka qenë një rrugë e gjatë dhe vazhdon të jetë një rrugë e gjatë, por ka shumë mundësi që të ketë një takim shumë shpejt”, shtoi ai.
Të mërkurën në mëngjes, Trump informoi partnerët evropianë, përfshirë kancelarin gjerman Friedrich Merz, për një takim midis Putinit dhe të dërguarit të posaçëm të SHBA-së, Steve Witkoff në Kremlin.
Ndërkohë, ”New York Times” raportoi, duke cituar dy burime të njohura me planin, se Trump synon të takohet me Putinin personalisht që javën e ardhshme dhe se një takim trepalësh me Zelensky do të zhvillohet menjëherë pas kësaj.
Transmetuesi amerikan CNN raportoi, duke cituar një burim nga qeveria evropiane, se Trump tha se “ka ndërmend të takohet me Putinin dhe Zelenskyn që javën e ardhshme”.
Putin dhe Witkoff u takuan për rreth tre orë në Kremlin të mërkurën, vetëm disa ditë para afatit të caktuar nga Trump për një armëpushim në Ukrainë.
Moska i quajti bisedimet “të dobishme dhe konstruktive”.
