Një ngjarje e rëndë ka tronditur komunitetin shqiptar në Itali, ku një 21-vjeçar dyshohet se ka vrarë me thikë nënën e tij, 39-vjeçaren Meleqe Lusha. Krimi ka ndodhur në banesën e familjes, në rrugën Tagliata, në qytetin Chiari, në provincën e Brescias.
Pas ngjarjes, i riu është larguar nga shtëpia, ndërsa disa kohë më vonë është paraqitur në mënyrë vullnetare në kazermën e Karabinierëve në Cremona, ku ka rrëfyer atë që kishte ndodhur.
Sipas raportimeve të mediave italiane, 21-vjeçari është identifikuar si Eduart Xhani, i lindur në San Bonifacio, në provincën e Veronës.
Pas njoftimit të marrë prej tij, efektivët e Karabinierëve kanë shkuar në banesën familjare, ku kanë gjetur trupin e pajetë të 39-vjeçares.
Hetimet për zbardhjen e ngjarjes
Në vendin e krimit kanë mbërritur edhe specialistët e Seksionit të Hetimeve Shkencore të Komandës Provinciale të Karabinierëve të Brescias, të cilët kanë kryer këqyrjen e vendngjarjes dhe kanë mbledhur prova që mund të ndihmojnë në hetim.
Autoritetet italiane po punojnë për të rindërtuar plotësisht rrethanat dhe dinamikën e ngjarjes, si dhe për të përcaktuar motivet që çuan në këtë krim të rëndë.
Deri më tani nuk janë bërë publike detaje të tjera lidhur me shkaqet e ngjarjes. Hetimet vijojnë, ndërsa autoritetet po tregohen të rezervuara për informacionet e mëtejshme.
