Pika e kalimit kufitar e Qafë Botës ka ndryshuar orarin e funksionimit, pas rikthimit të orarit dimëror nga pala greke. Duke nisur nga dita e hënë, shërbimi në këtë pikë kufitare do të ofrohet nga ora 07:00 deri në 21:00 sipas orës shqiptare, ndërsa sipas orës greke nga 08:00 deri në 22:00.
Ky ndryshim prek të gjithë qytetarët dhe drejtuesit e automjeteve që udhëtojnë mes Shqipërisë dhe Greqisë përmes kësaj pike kufitare.
Me përfundimin e sezonit veror, dogana greke e Mavromatit rikthehet në orarin e reduktuar, pas zgjerimit të tij gjatë muajve të verës. Në maj të vitit 2026, orari i shërbimit ishte zgjatur me dy orë, duke nisur nga ora 05:00 e mëngjesit deri në 23:00, sipas orës shqiptare, për t’iu përgjigjur fluksit më të lartë të udhëtarëve gjatë sezonit turistik.
Me vendosjen e orarit dimëror, pika kufitare do të qëndrojë e hapur katër orë më pak në ditë në krahasim me periudhën e verës. Konkretisht, hapja do të bëhet dy orë më vonë, ndërsa mbyllja dy orë më herët.
Për këtë arsye, qytetarët që planifikojnë të udhëtojnë drejt Greqisë apo të kthehen në Shqipëri përmes Qafë Botës duhet të marrin në konsideratë orarin e ri 07:00-21:00, për të shmangur mbërritjen në pikën kufitare jashtë fashës kohore të shërbimit.
