Policia e Tiranë në bashkëpunim me Prokurorinë ka goditur dy raste të trafikimit të kanabisit me përqindje të lartë THC nga SHBA me qëllim shitjen në Tiranë.
Si rezultat, në kuadër të operacionit të koduara “Pako 1” dhe “Pako 2” janë arrestuar tre persona, të cilët janë kapur në momentin kur kanë marrë pakot me rreth 1.6 kg kanabis në degët postare në Tiranë dhe në Shkodër, ndërsa janë shpallur në kërkim dy porositësit.
“Gjatë operacionit “Pako 1”, u arrestuan shtetasit A. P., 24 vjeç dhe A. Xh., 55 vjeç, duke marrë në një degë postare në Tiranë, një pako me rreth 522 gramë kanabis, me përqindje të lartë THC, që dyshohet se ishte trafikuar nga ShBA. Nga hetimet ka rezultuar se porositësi i pakos ishte shtetasi B. F., 25 vjeç, i cili u shpall në kërkim.
Gjatë operacionit “Pako 2”, u arrestua shtetasi M. H., 19 vjeç, duke marrë në një degë postare në Shkodër, një pako me rreth 1.07 kilogramë kanabis, me përqindje të lartë THC, që dyshohet se është trafikuar nga ShBA. Nga hetimet ka rezultuar se porositësi i pakos ishte shtetasi G. P., 23 vjeç, i cili u shpall në kërkim.” – njofton Policia e Tiranës.
Materialet procedurale i janë referuar Prokurorisë së Tiranës për veprime të mëtejshme.
