Rikthimi i Xhuliano Skukës te partizani konsiderohet si çështje e mbyllur, ndaj mbettë vetëm konfirmimi zyrtar nga palët. Indirekt rikthimi i sulmuesit dibran është quajtur i finalizuar, pasi një gjë të tillë e kanë bërë disa personazhe të lidhur me “demat e kuq”.
Fillimisht ka qenë kapiteni Valentino Murataj që me një postim në Instagram ka dhënë sinjalin e ribashkimit me Skukën. Por një sinjal më i fortë ka ardhur nga brenda familjes së presidentit të Partizanit. Vajza e presidentit Demi ka postuar në profilin e saj një “story”, ku duket Skuka duke festuar një gol me fanellën e Partizanit.
Por historia nuk mbaron këtu, pasi këtë postim e ka shpërndarë edhe sulmuesi dibran. Ndaj mbetet për të parë se kur do të finalizohet rikthimi i Skukës, i cili në fillim të sezonit u huazua nga francezët e Metzit te Maribori. Por aventura e Skukës në Slloveni quhet e mbyllur dhe gjasat janë që klubi francez ta kthejë Skukën te Partizani fillimisht në formë huazimi deri në fund të këtij sezoni.
