Grupi organizator i protestës së paralajmëruar për ditën e shtunë ka bërë një thirrje simbolike për pjesëmarrësit, duke i ftuar ata të sjellin me vete këpucë të familjarëve apo të afërmve që kanë emigruar dhe nuk mund të jenë të pranishëm.
Përmes një mesazhi publik, aktivisti Andi Tepelena u kërkon qytetarëve që protesta t’i dedikohet edhe diasporës shqiptare, duke kujtuar ata që, sipas organizatorëve, janë detyruar të largohen nga vendi për arsye social-ekonomike.
“Ditën e shtunë, këpucë për ata që mungojnë. Të gjithë me këpucë me vete të atyre që nuk mund të jenë në protestë, të detyruar për shkak të kushteve social-ekonomike të braktisin Shqipërinë”, thuhet në thirrjen e Tepelenës.
Sipas organizatorëve, këpucët do të grumbullohen para Kryeministrisë për të krijuar një instalacion simbolik, që synon të përfaqësojë revoltën dhe pakënaqësinë ndaj fenomenit të emigracionit dhe shpopullimit të vendit.
Ata u bëjnë gjithashtu thirrje qytetarëve që të shpërndajnë sa më gjerësisht nismën dhe të marrin pjesë në protestën e së shtunës.
