Më shumë se 27 mijë maturantë i’u nënshtruan sot provimit të parë të Matematikës, por edhe kësaj here, pak minuta pas fillimit të provimit, teza u publikua në rrjete sociale.
Publikimi i tezës vërtetoi edhe një herë dështimin e Ministrisë së Arsimit.
Ministria e Arsimit ka bërë një reagim ku justifikohet për dështimin duke thënë se fotografimi dhe publikimi i tezës së provimit të maturës, pasi ka nisur provimi, nuk ndikon aspak në proces.
Edhe pse u vërtetua hapur dështimi, ministria e Arsimit shprehet se kanë forcuar elementët teknikë të kontrollit, përfshirë kamerat e sigurisë, rregullat për hyrje-daljet dhe standardet e administrimit, duke synuar një ambient të qetë dhe të përshtatshëm për çdo nxënës.
“Publikimi i tezës së provimit pasi nxënësit kanë nisur testimin, nuk ndikon në mbarëvajtjen dhe integritetin e procesit. Ministria dhe strukturat arsimore kanë ndërmarrë një sërë masash paraprake për të siguruar zhvillimin e drejtë dhe të barabartë të procesit të Maturës Shtetërore, përfshirë: mbikëqyrjen e ambienteve të provimit përmes kamerave të sigurisë, trajnimin e administratorëve, kontrollin e rreptë të hyrjes dhe daljes, si dhe krijimin e kushteve sa më të përshtatshme për të reduktuar stresin te maturantët për të arritur rezultate të merituara. Këto masa garantojnë një proces të besueshëm, transparent dhe të drejtë për të gjithë”, tha MAS.
