Shoqërimet e protestuesve nga persona me rroba civile dhe përdorimi i gazit lotsjellës kanë shoqëruar protestën e zhvilluar mbrëmjen e 15 tetorit në Tiranë, duke shtuar tensionet në kryeqytet.
Gjatë orëve të mbrëmjes janë raportuar raste të shoqërimit të të rinjve nga persona me rroba civile, identiteti i të cilëve nuk ka qenë gjithmonë i qartë për qytetarët e pranishëm. Në një prej rasteve të raportuara, një protestuese është futur me forcë në një automjet civil nga disa persona, ndërsa mënyra e ndërhyrjes ka ngritur pikëpyetje mbi identifikimin e tyre dhe procedurat e ndjekura gjatë shoqërimit.
Po ashtu, janë ngritur shqetësime për përdorimin e forcës gjatë ndërhyrjeve dhe për raste të mundshme të dhunës ndaj qytetarëve. Sipas informacioneve të raportuara, një kalimtar që nuk ishte pjesë e protestës dyshohet se është dhunuar dhe ka pësuar dëmtime të rënda në këmbë. Shqetësime janë shprehur edhe për trajtimin e personave të shoqëruar në komisariate, ndërsa këto pretendime mbeten për t’u verifikuar nga autoritetet.
Ndërkohë, situata e tensionuar është zhvendosur edhe në Qytetin Studenti, ku një grup protestuesish, të pajisur me sende të forta, kanë thyer xhamat e një godine. Sipas informacioneve paraprake, incidenti dyshohet se ka ndodhur në konviktin e vajzave.
Ngjarja ka shkaktuar frikë dhe shqetësim te studentet që ndodheshin në konvikte, të cilat janë shprehur të frikësuara nga situata. Incidenti ka ngritur pikëpyetje mbi sigurinë e tyre dhe mbrojtjen e ambienteve ku jetojnë.
Gjithashtu, në rrjetet sociale po qarkullojnë disa mesazhe anonime që pretendohet se janë dërguar nga punonjës policie, ku ngrihen akuza për praninë e personave nga Serbia dhe organizimin e akteve të dhunës gjatë protestave në Tiranë. Këto pretendime ende nuk janë verifikuar zyrtarisht.
