Komisioneri Shtetëror i Zgjedhjeve, Ilirjan Celibashi, vendosi sot përfundimin e procedurave administrative për dy kandidatët Euglen Gjini dhe Ilir Mollaj, që i ishin nënshtruar verifikimeve nga Prokuroria e Përgjithshme, pa një vendim përfundimtar.
Celibashi theksoi se “ka humbur objekti dhe qëllimi i procedurës”, pas përfundimit të zgjedhjeve parlamentare të 11 majit.
“U shqyrtua rezultati i verifikimit të Prokurorit të Përgjithshëm për subjektin vetëdeklarues Euglen Gjini, kandidat për deputet, i propozuar nga subjekti zgjedhor Koalicioni “Nisma Shqipëria Bëhet-Adriatik Lapaj”, Qarku Fier, për zgjedhjet për Kuvend të datës 11 maj 2025. Vendosëm deklarimin e procedurës administrative të përfunduar dhe pa vendim përfundimtar për Gjini, pasi vlerësohet se ka humbur objekti dhe qëllimi i procedurës administrative të filluar përpara ditës së zgjedhjeve.
“U shqyrtua gjithashtu rezultati i verifikimit të Prokurorit të Përgjithshëm për subjektin vetëdeklarues Ilir Mollaj, kandidat për anëtar në Këshillin e Bashkisë Mirditë, i propozuar nga subjekti zgjedhor “Partia Lëvizja e Legalitetit”, për zgjedhjet për organet e qeverisjes vendore, të datës 14 maj 2023. Deklaruam procedurën administrative të përfunduar dhe pa vendim përfundimtar për Mollaj, pasi vlerësohet se ka humbur objekti dhe qëllimi i procedurës administrative të filluar përpara ditës së zgjedhjeve”, njoftoi Komisioneri Zgjedhor i Zgjedhjeve”, tha njoftoi Celibashi.
Gjithashtu, Celibashi njoftoi se gjatë seancës u plotësuan edhe vakancat e krijuara në pesë këshilla bashkiakë.
“Vakancat u plotësuan në: Këshillin e Bashkisë Tiranë, me kandidatin nga lista shumemërore e Koalicionit “Bashkë Fitojmë”, Fatjon Bathorja; Këshillin e Bashkisë Dibër, me kandidatin nga lista shumemërore e Partisë Socialiste të Shqipërisë, Aida Murrja; Këshillin e Bashkisë Vorë, me kandidatin nga lista shumemërore e Partisë “Fryma e Re Demokratike”, Lavdurije Shahini; Këshillin e Bashkisë Belsh, me kandidatin nga lista shumemërore e “Partisë Socialiste të Shqipërisë”, Avni Shtylla; Këshillin e Bashkisë Rrogozhinë me kandidatin nga lista shumemërore e Partisë Republikane Shqiptare, Dhurata Meka”, njoftoi Celibashi.
