Stuhia e fortë që goditi mbrëmjen e kaluar Sarandën ka shkaktuar disa të lënduar dhe dëme materiale në qytet. Tre persona kanë marrë ndihmë mjekësore në spital, ndërsa të tjerë kanë pësuar lëndime të lehta.
Sipas informacioneve paraprake, disa prej të lënduarve u plagosën pasi një pishë u rrëzua mbi automjete pranë stadiumit, duke thyer xhamat e tyre. Një tjetër person u godit nga degët e një peme teksa po lëvizte me motor.
Gjatë natës, shërbimet e emergjencës larguan pemët e rrëzuara nga rrugët, ndërsa në disa zona u raportuan ndërprerje të energjisë elektrike. Në portin e Limionit u rrëzua edhe një shtyllë elektrike, ndërsa dëme janë regjistruar edhe në banesa dhe biznese.
Ndërkohë, në Himarë një punonjës 55-vjeçar i OSHEE-së humbi jetën gjatë një ndërhyrjeje për riparimin e një defekti në rrjetin elektrik. Ngjarja ndodhi rreth orës 03:00, në kushtet e motit të keq që kishte shkaktuar probleme me furnizimin me energji në disa zona. Punonjësi, me origjinë nga Elbasani, ishte angazhuar për të mbështetur ekipet lokale në rikthimin e energjisë elektrike.
