SPAK ka zgjeruar ndjeshëm hetimet lidhur me tenderat e dhënë nga Agjencia Kombëtare e Shoqërisë së Informacionit (AKSHI), duke bashkuar në një dosje të vetme çështjet që lidhen me drejtues dhe kompani të përfshira në procedura të dyshuara abuzuese.
Sipas informacioneve në qendër të hetimit ndodhet edhe Ermal Beqiri dhe kompania e tij “Soft & Solution”, e cila dyshohet se ka përfituar në mënyrë të përsëritur tendera të AKSHI-t përmes procedurave me garë të kufizuar dhe konkurrentëve formalë. SPAK ka sekuestruar dokumentacion, kontrata dhe të dhëna financiare për të verifikuar mënyrën e zhvillimit të këtyre prokurimeve. Ermal Beqiri dyshohet për korrupsion në tenderat e AKSHI.
InfoNews, mëson se në SPAK pritet të thirren persona të tjerë të cilët dyshohet se kanë përfituar tendera korruptivë tek AKSHI.
Ai është denoncuar nga opozita si përfitues i shumë tenderave në AKSHI, ndërsa pak kohë më parë, PD ka denoncuar një procedurë prokurimi të paligjshme.
Partia Demokratike denoncoi se në muajin tetor 2024 u shpall fituese kompania ‘SOFT and Solution SHPK’, me pronësi të Ermal Beqirit me vlerë 3.1 milionë euro, teksa janë skualifikuar dy kompani të tjera. PD i bëri thirrje SPAK që të hetojë tenderat dhe veprimtarinë e institucionit.
Paralelisht, nën hetim ndodhet edhe Mirlinda Karçanaj, drejtuesja e AKSHI-t, e cila dyshohet se ka pasur rol në procedurat ku dyshohet manipulim i garës dhe favorizim operatorësh të caktuar. Hetimet konsiderohen tashmë si një zinxhir i gjerë që përfshin administratën, kompani private dhe tendera me vlera të mëdha.
Sipas burimeve, të dy kompanitë e Beqirit dhe Agasit, “Soft & Solution” dhe “EA Solution”, kanë fituar dhjetëra projekte publike, shpesh në një periudhë të shkurtër kohore, duke ngritur dyshime për një skemë të mundshme bashkëpunimi ose rotacion tenderash.
Këto zhvillime vijnë në një periudhë kur SPAK po heton edhe raste të tjera të rëndësishme të prokurimeve publike.
SPAK pritet të marrë vendime të tjera hetimore në vijim, ndërsa dosja e AKSHI-t dhe kompani të lidhura me të shihet si një nga rastet më të rëndësishme të vitit në luftën kundër korrupsionit në prokurime publike.
