“Pyll pa derra s’ka”. Kështu i është përgjigjur kryeministri Rama një komenti në Facebook, referuar socialistëve që janë burgosur.
Në një komunikim që ka zgjedhur të bëjë me ndjekësit, Rama tha se ata që sot dënohen e burgosen, po faturohen si një e metë e PS, por sipas kryeminsitrit “pyll pa derra s’ka”. Dhe sipas Ramëes, derra të tillë i gjen edhe brenda PS.
Kryeministri u justifikua me faktin se tashmë drejtësia po del nga kthetrat e pushtetit dhe se mund të godasë në të gjitha kahet.
Rama: Sa i përket drejtësisë, ka një diskutim të vazhdueshëm dhe të pakuptueshëm për mua që jo u fut ky apo ai në burg. Këto faturohen si faje apo si përgjegjësi apo e metë e PS. Pa PS dhe vullnetin tonë kurrën e kurrës nuk do të ndodhte kjo që po ndodh, që drejtësia të çlirohet nga kthetrat e pushtetit politik dhe të veprojë se pavarësisht se cilës anë i përket njëri apo tjetri. Nuk ka ndodhur që nga 1912 që të ketë një person të lidhur me pushtetin politik që të jetë vënë para drejtësisë së pavarur. Nuk po flasim për persona të lidhur me pushtetin politik në komunizëm apo si Fatos Nano që u dënua nga një gjykatë politike. Po flasim për institucione të pavarësuara. Kjo është arritje historike e PS. Nuk duhet të diskutohet fare se këtu në Shqipëri ka vetëm një parti që lufton përditë për të bërë shtet. PS komuniteti më i madh politik i shqiptarëve dhe si çdo pyll që ka derrat e vet, edhe PS ka njerëz që për fat të keq i përkasin drejtësisë dhe jo më rrugës së partisë. Thënë të gjitha këto, sot nuk ka më shumë korrupsion, por ka më pak. Shqipëria nuk do të ishte e para në rajon dhe me diferencë pikësh. Të krahasosh Shqipërinë sot me para një dekade duhet të pranosh se i ke vënë drynin memories dhe praktikisht nuk ke asnjë interes për të vërtetën.”, u shpreh Rama.
