Një tjetër tender i zhvilluar nga Bashkia Himarë, e drejtuar nga kryebashkiaku Vangjel Tavo, ka ngritur pikëpyetje për mënyrën e zhvillimit të procedurës së prokurimit publik. Bëhet fjalë për tenderin me objekt “Rikonstruksioni i rrugës Borsh – Fterrë”, me fond limit 233,333,333 lekë, i financuar nga buxheti i bashkisë.
Sipas të dhënave të publikuara në platformën e transparencës së prokurimeve publike, procedura është zhvilluar si procedurë e hapur për punë publike, ndërsa sistemi ka evidentuar edhe indikatorë të quajtur “flamuj të kuq”, të cilët sinjalizojnë rrezik potencial për probleme në konkurrencë ose në përputhshmërinë me rregullat e prokurimit publik.
Në garë morën pjesë 8 operatorë ekonomikë, mes tyre kompani të njohura në sektorin e ndërtimit si “Salillari”, “Gjikuria”, “Ndregjoni”, “G.P.G Company”, “ERGI”, si dhe bashkime operatorësh të tjerë. Pas procesit të vlerësimit, fitues u shpall bashkimi i operatorëve “Meteo” shpk & “Shendelli” shpk, me ofertë 217,905,187 lekë pa TVSH, ndërsa kontrata parashikon një afat realizimi prej 12 muajsh.
Gjatë procedurës janë skualifikuar disa operatorë ekonomikë. Mes tyre edhe bashkimi i operatorëve “Alko Impex Construction” shpk & “Alko Impex General Construction”, pasi sipas dokumentacionit oferta nuk ishte në përputhje me kërkesat dhe specifikimet e përcaktuara në dokumentet e tenderit dhe nuk plotësonte kriteret e ligjit për prokurimin publik.
Po ashtu janë skualifikuar edhe operatorë të tjerë si “G.P.G Company”, “Gjikuria & Senka”, “Ndregjoni & Rafin Company” dhe “Salillari”, me argumentin se ofertat e tyre nuk përmbushnin kërkesat teknike dhe administrativo-ligjore të përcaktuara në dokumentet e tenderit.
Procedura për këtë projekt rrugor është shpallur më 27 mars 2025, ndërsa fituesi është njoftuar më 23 tetor 2025. Projekti parashikon rikonstruksionin e aksit rrugor Borsh – Fterrë, një segment i rëndësishëm për lidhjen e zonave të bregdetit me zonat e brendshme.
Megjithatë, fakti që procedura është shënuar me “flamuj të kuq”, që sinjalizojnë përjashtimin e ofertës me vlerë më të ulët dhe skualifikimin e operatorëve konkurrues gjatë procesit, ka ngritur pikëpyetje mbi mënyrën e zhvillimit të kësaj gare publike dhe nivelin real të konkurrencës në tender.
