Prokuroria e Posaçme kundër Korrupsionit dhe Krimit të Organizuar (SPAK) ka intensifikuar hetimet mbi veprimtarinë dhe përfitimet financiare të shoqërisë “Gogel” sh.p.k., në pronësi të Arbër Veliajt, vëllait të Erion Veliajt. Burime pranë hetimit bëjnë me dije se veprimet hetimore janë shtrirë edhe në disa kompani të tjera të lidhura ngushtë me këtë shoqëri.
Sipas të njëjtave burime, SPAK ka evidentuar marrëdhënie financiare ndërmjet Bashkisë së Tiranës, “One Albania” sh.a. dhe “Gogel” sh.p.k., si dhe lidhje tregtare me subjekte që kanë përfituar fonde publike për aktivitete të organizuara nga bashkia gjatë viteve 2020–2024.
Verifikimet tregojnë se këto kompani, përveç kontratave me institucione publike, kanë pasur ndërveprime të vazhdueshme financiare me “Gogel” sh.p.k., e zotëruar nga Arbër Veliaj. Ndërkohë, Erion Veliaj rezulton aktualisht i pandehur me 13 akuza.
Nga dokumentacionet e sekuestruara, SPAK konstaton se për një periudhë katërvjeçare Bashkia e Tiranës ka shpenzuar rreth 2.4 milionë euro për aktivitete artistike, kulturore dhe sponsorizime.
Po ashtu, nga analiza e të dhënave në Portalin Qendror të Kontrollit dhe Menaxhimit (Fiskalizimi), rezulton se shoqëria “Arts Lab” sh.p.k., me administrator Erald Simixhiu—i cili raportohet të ketë lidhje të afërta familjare me Ajola Xoxën—ka regjistruar gjatë vitit 2024 një sërë faturash shitjeje, përfshirë një faturë me vlerë 698,285 lekë ndaj një subjekti tregtar.
Hetimet vijojnë, ndërsa SPAK po analizon rrjedhën e fondeve dhe rolin e secilit subjekt në skemën e dyshuar financiare.
