Komisioni Evropian, në raportin e fundit për Shqipërinë, kërkoi që vendi të forcojë përpjekjet për të luftuar krimin e organizuar, për të përmirësuar sistemet për të parandaluar pastrimin e parave dhe për të luftuar trafikimin e qenieve njerëzore, si thelbësore për t’u përafruar me standardet e BE-së.
Por për Ramën, krimi dhe dhe korrupsioni janë probleme serioze, por jo ekskluzive për Tiranën. I ftuar në një intervistë për The Europe Conversation në Euronews, kryeministri tha se edhe Brukseli ka probleme të tilla, duke tentuar të relativizojë problemet e qeverisë me krimin e organizuar dhe korrupsionin.
“Më parë njerëzit mendonin se Shqipëria ishte kjo gropë e mjerë në mes të Evropës, tani e shohin atë si pjesë të mozaikut evropian”, tha ai në The Europe Conversation. “A kemi probleme me krimin e organizuar? Po, por kush nuk ka? Shikoni këtë qytet (Brukselin). Edhe Brukseli ka krim. Ky është një shembull tjetër. Por ka edhe gjëra të shkëlqyera.”
Ndërsa Rama relativizon problemet e krimit dhe korrupsionit, Brukseli e ka qartë: Shqipëria ka ende punë për të bërë. Krahasimet me qytete të tjera mund të tingëllojnë optimiste për kryeministrin, por standardet e BE-së nuk pranojnë kompromis.
Por çfarë thotë progres-raporti i KE?
Komisionit Evropian vlerëson se vendi ka bërë përparime të dukshme në luftën kundër korrupsionit dhe krimit të organizuar, megjithatë korrupsioni mbetet i përhapur në sektorë vulnerabël si arsimi, shëndetësia dhe prokurimet publike, dhe presioni politik mbi drejtësinë vazhdon të paraqesë sfida.
Raporti thekson nevojën për vazhdimësi reformash, transparencë më të madhe dhe forcim të institucioneve anti-korrupsion për të arritur rezultate konkrete dhe për të garantuar pavarësinë e sistemit gjyqësor.
Korniza institucionale për parandalimin e korrupsionit vazhdoi të ketë një ndikim të kufizuar dhe koordinimi me zbatimin e ligjit mbeti i dobët. Mangësitë në lidhje me transparencën dhe efektivitetin e kontrolleve të deklarimit të pasurisë ende duhen adresuar. Shqipëria duhet në veçanti: të vazhdojë të forcojë hetimin, ndjekjen penale dhe gjykimin e rasteve të korrupsionit dhe të sigurojë më shumë dënime përfundimtare, veçanërisht në nivel të lartë, duke përfshirë sekuestrimin dhe konfiskimin përfundimtar të aseteve kriminale që vijnë nga veprat penale të lidhura me korrupsionin, të kryejë vlerësime të thelluara të rrezikut në sektorët vulnerabël dhe të bëjë kontrollet e deklarimit të pasurisë nga Inspektorati i Lartë i Deklarimit dhe Auditimit të Pasurive dhe Konfliktit të Interesit (ILDKPKI) më efektive dhe transparente duke përditësuar procedurat dhe duke siguruar burime të mjaftueshme, duke adresuar pasuritë e padeklaruara ose të fshehura dhe duke siguruar që asetet të jenë të pavlefshme.
Sa i përket krimit të organizuar, KE thekson se Shqipëria duhet të forcojë më shumë hetimet dhe dënimet në fushat e krimit të organizuar, duke përsosur sistemin e rikuperimit të aseteve.
Shqipëria është mesatarisht e përgatitur në luftën kundër krimit të organizuar. Megjithatë, duhet të vazhdojë të forcojë hetimet, ndjekjet penale dhe dënimet përfundimtare në të gjitha fushat e krimit të rëndë dhe të organizuar, të përmirësojë efikasitetin e sistemit të rikuperimit të aseteve dhe të përmirësojë kapacitetin e analizës kriminale dhe financiare.
