Një ngjarje e rëndë është regjistruar gjatë natës në qytetin e Fier, në lagjen “8 Shkurti”, ku një person ka humbur jetën gjatë një tentative për vjedhje.
Sipas informacioneve paraprake, një 40-vjeçar, ende i paidentifikuar, dyshohet se ka tentuar të hyjë për të grabitur një banesë trekatëshe. Gjatë përpjekjes për t’u futur nga dritarja, ai ka mbetur i bllokuar, duke i ngecur gjysma e trupit, çka i ka shkaktuar vdekjen.
Banesa në fjalë i përket shtetasit Uan Lule, i cili prej rreth një muaji ndodhet në Greqi pranë fëmijëve të tij. Sipas deklarimeve të familjarëve, shtëpia mbahej nën kujdes nga një fqinj, i cili ka qenë edhe personi që ka konstatuar ngjarjen e rëndë dhe ka njoftuar menjëherë policinë.
Vëllai i kryefamiljarit, Nikollaq Lule, ka bërë me dije se viktima është gjetur i pajetë në dritare, duke ngritur dyshime të forta se bëhet fjalë për një tentativë vjedhjeje që përfundoi në mënyrë fatale.
Trupi i pajetë është transportuar drejt morgut të Fier, ndërsa autoritetet po punojnë për identifikimin e viktimës dhe sqarimin e plotë të rrethanave të ngjarjes.
