Ish-kryetari i Partisë së Legalitetit, Ekrem Spahia, ka komentuar konfliktin mes Princ Lekës dhe Elia Zaharisë, duke u shprehur se ka dijeni pasi ka qëndruar shpesh pranë familjes mbretërore.
Ai rrëfeu në emisionin “Breaking” në Top News, se gjithçka nisi pasi Princ Leka vuri re se në ndërtesën mbretërore, të cilën ia ka lënë familjes Zaharia, ishin hapur disa dollape, pasi kishte shkuar për të takuar vajzën.
“Princi rezaton mirësi. Ai ka shkuar të takojë princeshën Geraldina në katin e dytë. U ka lënë edhe shtëpinë, ka disa muaj që është larguar nga rezidenca pikërisht për të shmangur këto probleme. Në momentin që ka shkuar i ka parë hapur dollapet, ka thënë “pse janë hapur këto?”.
Rezidenca është një familje që ka edhe muze, ato janë me vlera, janë relike të çmuara. Ai s’ka marrë asnjë, shtëpia e tij është. Në momentin që është takuar me vajzën, vajza i ka thënë se gjyshi më ka thënë “këtë, këtë”, fjalë që unë nuk mund t’i them sot në studio. Në këtë moment ai ka thirrur, dhe ka nisur konfrontimi, i ka thënë nuk do dal unë, por do dalësh ti jashtë.
Erdhi një moment, Princi është një njeri që, pavarësisht se unë kam ato bindje, ai është një njeri i mirëarsimuar, i kulturuar, i qytetëruar, që nuk mund të thotë një fjalë të keqe”, tha Spahia.
